Ötən il Azərbaycanın dövlət sərhədlərindəki 4 sərhəd nəzarət məntəqəsində radiasiyanı aşkar edən portal monitorların qurulması başa çatdırılıb. APA-nın məlumatına görə, bu barədə Azərbaycan hökumətinin Milli Məclisə təqdim etdiyi hesabatda bildirilib.
   
   ABŞ-ın Enerji Departamenti və Dövlət Sərhəd Xidməti arasında "Nüvə və digər radioaktiv maddələrlə qanunsuz ticarət əleyhinə əməkdaşlığa dair Saziş" çərçivəsində bu monitorlar "Sədərək", "Culfa", "Şahtaxtı" və "Şıxlı" sərhəd məntəqələrində qurulub. Hazırda Azərbaycanın İranla sərhədindəki iki - "Astara" və "Biləsuvar" sərhəd nəzarət məntəqələrində də analoji monitorlar quraşdırılır.
   
   Ötən il sərhəd qarnizonlarında və zastavalarda təmir işləri ilə yanaşı, "Göytəpə" Sərhəd Dəstəsinin qarnizonunda 300 yerlik kazarma binası, 2 sərhəd komendantlığı, 1 sərhəd zastavası kompleksi, iki zastavada 4 mənzilli yaşayış binası, Gürcüstanla sərhədi mühafizə edən "Şəmkir" Sərhəd Dəstəsində 5 sərhəd zastavası kompleksi, Rusiya ilə sərhədin bir hissəsini mühafizə edən "Şəki" Sərhəd Dəstəsində 2 zastava, "Zaqatala" Sərhəd Dəstəsində isə üçüncü sərhəd komendantlığı üçün bina tikilib. Sərhəd Qoşunları üçün Beyləqan rayonunda aerodromun tikintisi də başa çatdırılıb.