ABŞ Nümayəndələr Palatasının Xarici Əlaqələr Komitəsinin qondarma "erməni soyqırımı"nı tanıması Avropa mətbuatında birmənalı qarşılanmayıb. "The Guardian" qəzeti ABŞ Nümayəndələr Palatasının Xarici Əlaqələr Komitəsində təmsil olunan konqresmenləri ələ salıb.
   
   Tia.az xəbər verir ki, ingilis qəzeti konqresmenləri cahil, onların qərarını isə cahilcə atılmış addım kimi qiymətləndirib: "Soyqırımın tanınması çətin məsələdir. Amma dəqiq və anlaşılan bir şey var ki, o da soyqırım olayını tanımaq ABŞ Konqresinin işi deyil".
   
   Yazının müəllifi Marsel Berlins daha sonra konqresmenləri sərt şəkildə tənqid edərək, onları işləri ilə məşğul olmasını tövsiyyə edib: "Sizə nə? Bu sizin işiniz deyil. Məni narahat edən odur ki, bu cür siyasi müdaxilə və reklamlarla insanlıq tarixinin ən ağır ittihamı olan soyqırım cinayəti daha da alçaldılır. Eyni zamanda bu, yaxşı maliyyələşən bir lobbinin əlində əsir olan cahil konqres üzvlərinin hərəkətinə çevrilir".
   
   Marsel Berlins son əsrdə iki soyqırım olduğunu və onların da yəhudi və ruanda soyqırımları olduğunu deyərək ermənilərin belə bir iddiada olmasını yanlış hesab edib. "Osmanlı İmperiyasının günahkar olub, olmadığı müzakirəyə açıqdır. Soyqırım hadisəsinə neçə nəfərin ölməsi kimi baxmaq yanlışlıqdır. Önəmli olan bir millətin tamamilə məhv edilməsinin sistemli şəkil almasıdır. Məncə soyqırım kimi, rəsmi və qanuni bir termindən istifadə etmək məhkəmənin işi olmalıdır. Daha mövqeyi şübhəli olan siyasətçilər bu barədə qərar verə bilməzlər".