Rusiyada demokratiyanın boğulmasına etiraz edənlərin dalğası həm eninə, həm də uzununa böyüyür. Əvvəllər mövcud hakimiyyətə siyasi dairələrdən və ayrı-ayrı vətəndaşlardan etiraz gəlirdisə, artıq bu prosesə ziyalı təbəqənin təmsilçiləri də qoşulub.
   
   "Exo Moskvi"radiosu xəbər yayıb ki, eyni gündə Rusiyanın iki tanınmış mədəniyyət xadimi Vladimir Putin-Dmitri Medvedev hakimiyyətinin ünvanına sərt sözlər səsləndirib. Onlar Rusiya hakimiyyətini "qəddar" və "abırsız" adlandırıblar. Müğənni Yuri Şevçuk və Rusiyanın əməkdar artisti, teatr və kino aktyoru Aleksey Devotçenkonun çıxışları ictimaiyyətdə şok effekti yaradıb.
   
   Yuri Şevçuk Olimpiyksdə keçirilən konsert zamanı 10 dəqiqə çıxış edib. O deyib ki, hazırda ölkədə sərt, qəddar hakimiyyət mövcuddur: "Xalq tək həbsxanalarda və düşərgələrdə deyil, uşaq evlərində və xəstəxanalarda əziyyət çəkir, işgəncələrə məruz qalır. Digər tərəfdən, hakimiyyətdə rütbəli nə qədər alçaq var. Onlar bizi soyur, yollarda sındırır, mağazalarda güllələyir və buna görə heç kəs məsuliyyət daşımır".
   
   Aleksey Devotçenko isə bildirib ki, öz blokunda həmkarlarını ölkədə 10 ildi, hökm sürən həyasız rejimi dəstəkləməməyə çağırıb.