Bir nömrəli Ərəb Çadır Şəhəri!
Qarabağı bizə məcməyidə verəcək ABŞ-ın, Fransanın və Rusiyanın təşkil etdiyi ATƏT-in yaradılmasının 20-ci ildönümü münasibətilə təntənəli bayram mərasimi.
Mərasimi giriş sözü ilə ölkəmizin ən stajlı Fəxri Qaçqını, "Ədalət" qəzetinin fəxri baş redaktoru Həsənqulu açdı.
- Əziz və çox hörmətli qaçqın bacı-qardaşlar, bu gün bizim üçün ən əlamətdar və xoşbəxt bir gündür. Düz iyirmi il əvvəl dünyada demokratiyanın beşiyi, hindu uşaqlarını öz övladlarından çox sevən ABŞ, Əlcəzairdə qırdıqları bir milyon müsəlmanı müsəlman kimi dəfn olunmasına icazə verdiklərinə görə İslam aləminin dostu və qardaşı Fransa, bizi iki yüz il sevgidən bağrına basıb sıxıb suyumuzu çıxaran Rusiya bizləri yurd-yuvamıza qaytarmaq üçün ATƏT-in Minsk qrupu deyilən təşkilatını yaratdı. Düz iyirmi ildi bu ölkələr bütün olmayan qeyrət və namuslarını ortaya qoyaraq bizlərdən ötrü özlərini öldürürlər. Qrupun həmsədrləri Metyu müəllim, Fasye müəllim və Merzlyakov müəllim evlərindən-eşiklərindən olublar, aylarla arvadlarını belə görə bilmirlər. Hətta sifətləri də uşaqlarının yadından çıxıb.
Əziz bacı-qardaşlar! Ağabəy Əsgərov ATƏT-i impatentdi, nədi ondan adlandırır. Mən Ağabəy müəllimə öz qəti etirazımı bildirirəm. Yazıqlar neyləsinlər ki! O qədər arvadsız qalıblar ki, özləri arvadlaşıblar. Kimlərinsə bədbəxtliyinə, şikəstliyinə həqarət etmək, lağ eləmək bizlərə yaraşmaz. Aqil Abbasın da əzizimiz Metyu Brayza haqqında yazdıqları müəyyən xoşagəlməz fikirlərin də qəti əleyhinəyəm. Aqil müəllim Metyu müəllimlə bizi qarşı-qarşıya qoyur, aramıza girmək istəyir. Ar olsun Aqil müəllimə. Metyu müəllim mənim canımdı-ciyərimdi, dədəmdi-nənəmdi, Fatmanisəmdi, hər şeyimdi.
Əziz bacı-qardaşlar! Metyu müəllim mərasimimizə təbrik teleqramı göndərib. Müsaidənizlə bizim Fatmanisə bir azdan həmin teleqramı sizlərə oxuyacaq.
Metyu müəllimin həmsədrlikdən vaxtsız getməsi xalqımız üçün, xüsusilə də biz qaçqınlar üçün, ələlxüsus da mənim üçün çox böyük itkidi. Metyu müəllimsiz bizlər üçün çox ağır olacaq. Metyu müəllimsiz ATƏT Foqtsuz bizim milli komandamız kimi bir zibildi.
İndi isə icazənizlə Metyu müəllimin təbrik teleqramını oxumaq üçün sözü bizim Fatmanisəyə verək.
Fatmanisə xanım kürsüyə qalxdı:
"Əziz mərasim iştirakçıları, sayğı dəyər qaçqın və məcburi köçkünlər və möhtərəm qonaqlar və qardaşım Həsənqulu! Siz mənim üçün dünyanın ən sevimli bəndələrisiz. Özü də təkcə mənim üçün yox, ABŞ-da, Avropada yeddi məhəllədən qovulanların, ərindən küsənlərin, arvadı evə buraxmayanların hamısı üçün! Sizin hesabınıza kababın, plovun, kürünün, xüsusilə kəlləpaçanın nə olduğunu bildik. Xüsusilə də kəlləpaçanız. Raketi, peyki nənəm də düzəldər, amma dünyanın heç bir milləti sizin kimi kəlləpaça bişirə bilməz. Qısası, yuxarıda qeyd etdiyim kimsələr sizin hesabınıza adam olub, adamlar cərgəsinə qoşuldular, televizyonlarda poz verdilər, ziyafətlərdə başda oturdular, jurnalistlər onlardan müsahibə almaq üçün növbəyə düzüldülər. Ermənilərin sevimlisinə, sizlərin də əziz xələfinə çevrildilər.
Mənim əzizlərim! Sabina Freyzer Bakıya əynində İstanbulun Çarşıbazarından aldığı iyirmi dollarlıq paltarla gəldi, Bakıdan daş-qaşın, qızıl-brilyantın içində döndü. İndi hər gün kilsədə sizlərə dua edir. Ərə də getdi. Mənə də İstanbulda hətta ABŞ milyonçularının görə bilmədiyi təmtəraqlı bir toy yapdınız, evləndirdiniz. Heyf ki, bizim Kondaliza Raysa bir türk kişisi tapmadız. Yoxsa bütün ABŞ-ın sizə bir minnət borcu olardı.
Əziz mərasim iştirakçıları, qardaşım Həsənqulu!
Bilmirəm sizin xəcalətinizdən necə çıxa biləcəm. Həyatda qazandığım bütün naz-nemətlərə və uğurlara görə sizlərə borcluyam!
Mənim əzizlərim! Bilirəm məndən ötrü bərk darıxırsız. Elə mən özüm də sizlərdən ötrü bərk darıxıram. İndi bərk çalışıram ki, sizləri intizarda qoymayam. İnşallah, işlər belə gedərsə, sizləri və məni gözü götürməyən namərdlər pəl vurmazsa Bakıya səfir kimi dönəcəm. Ondan sonra kef partladacağıq.
Əziz mərasim iştirakçıları və qardaşım Həsənqulu!
ATƏT-də məni əvəzləyəcək adam məndən simpatiçni olmasa da, pis şey deyil. Mən sizləri ona möhkəm-möhkəm tapşırmışam. Mənim xətrimə ondan muğayat olun. İnanıram ki, üz-gözünüz tezliklə ona öyrəşəcək. Türklər demiş, nasıl olsa uzun yıllar bir yerdə olacaqsız.
Sizləri bağrıma basıram, gözlərinizdən öpürəm. Allah bizi bir-birimizdən ayırmasın.
Fasye ilə Merzlyakovdan da bərk yapışın. Fasyenin qurbağa budlarını, Merzlyakovun tut arağını əskik eləməyin!
Tezliklə görüşərik!"
Fatmanisə Metyu Brayzanın son sözlərini bitirməmiş mərasimdən sürəkli alqışlar qopdu. Zalda kövrələnlər, sevinc göz yaşlarını saxlaya bilməyənlər vardı. Və zaldan necə "Urra" sədaları qalxdısa, bayırdakılar elə bildi ki, ATƏT məcməyinin örtüyünü götürdü və altından Qarabağ çıxdı.
Sonra söz millətimizin sevimlisi fransalı həmsədr Bernar Fasyeyə verildi. Fasye alqışlar altında kürsüyə qalxdı, üz-gözünü çox səliqə ilə dəsmalladı, sonra cibindən bir kağız çıxarıb oxumağa başladı:
- Əziz ermənilər! Biz fransızlar sizləri çox sevirik...
Zal bir anda dondu. Hamı təəccüblə əvvəl bir-birinə baxdılar, sonra bu əcayib-qərayib baxışlarını Fasyeyə tuşladılar.
Fasye bu baxışların ağırlığından çaşdı və o dəqiqə başa düşdü ki, kağızı səhv salıb.
- Pardon, pardon! Bermete, bermete! Kağızı səhv salmışam.
Cibindən başqa bir kağız çıxartdı və pörtmüş sir-sifətini bu dəfə bir az pərt halda dəsmalladı və oxumağa başladı:
- Əziz azərbaycanlılar! Biz fransızlar sizi çox sevirik. 1915-ci ildə Çanaqqalada siz azərbaycanlıların türk qardaşlarınızla birgə fransızlara göstərdiyiniz sevgi və mərhəməti heç vaxt unuda bilmərik. Ona görə də biz fransızlar uydurma erməni soyqırımını tanımadıq və onu tanımaq istəyənləri də həbslə cəzalandırdıq.
Əziz qaçqın bacı-qardaşlar!
Sözün düzü mənim sizə paxıllığım tutur. Parisdə qurbağa budunun bir porsusu restoranda min dollara olduğu halda, sizdə pulsuzdu. Fransada bunu bilsələr hamı tökülüb gələcək bura, özü də Parisdə krizisdi. Sizin xətrinizə mən bunu sirr kimi saxlayıram. Söz verirəm ki, mən də sizi heç vaxt tərk etməyəcəm. Həmsədrlikdən çıxandan sonra qalacam Azərbaycanda. Yox, Metyu Brayza kimi səfir olmayacam. "Fransaya Azərbaycan qurbağası" şirkəti quracağıq, sizinlə birlikdə qurbağa biznesi ilə məşğul olub milyonlar qazanacağıq. Elə təkcə şəhərinizin yanındakı qamışlıqda olan qurbağalarla Fransanı bir il təmin etmək mümkündü.
Əziz qaçqınlar! Qaldı Qarabağ probleminə, ermənilər qələt eləyir! Nə qədər ATƏT var, nə qədər onun Minsk qurupu var, sizləri bizim kimi sevən həmsədrlər var, Qarabağ sizindi! Yaşasın Fransa-Azərbaycan dostluğu!
Fasye alqışlar altında kürsüdən endi.
Həsənqulu:
- Əziz bacı-qardaşlar! Dərin və məzmunlu çıxış üçün Fasye müəllimə təşəkkürümüzü bildiririk. İndi isə sözü keçmiş böyük qardaşlarımız rusların nümayəndəsi, əzizimiz Merzlyakova veririk.
Merzlyakov saqqalını tumarlaya-tumarlaya çıxdı kürsüyə:
- Doroqie moi! Brati-syostri! İki yüz ildi bir yerdə yaşayırıq, hələ min il də bir yerdə yaşayacağıq. Kim deyir ki, biz ayrılmışıq?! Biz bir ailəyik. Sevincimiz, kədərimiz bir olub. Böyük Vətən Müharibəsində Rusiyanı faşist işğalından qorumaq üçün dörd yüz min azərbaycanlı həlak olub. Əgər Bakı nefti olmasaydı indi Moskvanın adı Hitlerburq, Peterburqun adı isə Gövbesqrad idi! Sizlər bizim bu yaxşılıqlarınızı unutduğumuzu sanırsınız. Siz elə bilirsiniz bircə siz Ağdamsız qalmısınız?! Xeyr! Bu gün bütün Rusiya "Ağdam"sız qalıb.
Əziz bacı-qardaşlar! Artıq rus xalqı ermənilərin əlindən boğaza yığılıb. Yanacaq ver, enerji ver, silah ver, sursat ver, tank ver, top ver, yağ ver, buğda ver, çörək ver, soldat ver. Klyanus boqa! Sizdən qopartdıqlarımızdan bir tikəni də rus xalqına yedirdə bilmirik. Hamısını veririk bu ermənilərə. Hamı yorulub. Putin də, Medvedev də, xalq da!
Doroqie moi! Metyu Brayzanın bizdən ayrılmağı işimizi bir az zora soxdu. O sizi çox sevirdi, professionallaşmışdı. Həm də nə qədər olmasa yeznəniz idi. Təzə gələn işi öyrənənəcən beş-on il lazım olacaq. Amma ürəyinizi sıxmayın, necə deyərlər, luçşe pozdno, çem nikoqda. Yaşasın Rusiya-Azərbaycan dostluğu!
Zaldakılar keçmiş böyük qardaşımızın möhtərəm nümayəndəsinin çıxışını ayaq üstə alqışladılar.
Həsənqulu belə dərin və məzmunlu nitqinə görə Merzlyakova da qaçqınlar adından minnətdarlığını bildirdi.
Həsənqulu:
- Əziz bacı-qardaşlar! Belə qərara gəlmişik ki, Metyu müəllimə uzun illər bizə göstərdiyi diqqət və qayğıya görə "Fəxri qaçqın" adı verək. Onsuz da o yazıq bizdən də betər gündədi. Neçə illər evindən-eşiyindən, yurdundan-yuvasından bizə görə qaçqın düşdü. Bizlər heç olmasa arvad-uşaqlarımızla bir yerdəyik, o yazıq isə heç aylarla təzəcə aldığı arvadını da görmür.
Qərar səsə qoyuldu və yekdilliklə qəbul olundu.
Sonra mərasim iştirakçıları adından BMT Təhlükəsizlik Şurasına, BMT-nin Baş katibi Pan Gi Muna bizə verdikləri dörd spravkaya görə minnətdarlıq məktubu göndərildi.
Sonra Həsənqulu ATƏT-in həmsədrləri olan dövlət başçılarının qaçqınlara təbrik məktubunu da oxudu:
- Əzizlərim, Barak Obama ATƏT-in iyirmi illiyi ilə əlaqədar bizə təbrik teleqramı göndərib. Teleqramda deyilir: "Hörmətli və sevimli qaçqın bacı və qardaşlar! Bu gün sizə Qarabağı məcməyidə təhvil verəcək ATƏT-in iyirmi illiyidi. Bu bayram münasibətilə sizləri, eləcə də ATƏT-in rəhbərliyini ürəkdən təbrik edir, sizə qaçqın həyatınızda daha böyük qaçqınçılıq arzulayıram və gün o gün olsun ki, ATƏT-in əlli illiyini də bax beləcə sevinclə qeyd edəsiniz. Biz amerikalılar həmişə sizin yanınızdayıq. Sizlər olmasa biz çoxdan elə sizin gününüzdə yaşayardıq. Ona görə həmişə sizə borcluyuq.
Həsənqulu cibindən başqa bir teleqram çıxarır:
- Əzizlərim bu teleqramı da Fransanın arvadını boşayaraq gözəl bir maniken alan prezidenti Sarkozi göndərib. Teleqramı sizə oxuyuram: "Hörmətli və sevgili qaçqın bacı-qardaşlar! Belə bir şayiə buraxıblar ki, guya biz erməniləri sizldən çox sevirik. Yalandı. Evimizdəki qaz sizin, evimizdəki işıq sizin, Luvr muzeyini bəzəyən xalçalar sizin. Biz qotur erməniləri niyə sevməliyik ki?! Biz hələ indən belə də düz əlli il həmsədrliyi davam etdirəcəyik. Yaşasın Fransa və Azərbaycan dostluğu!"
İlahi, zalda ağlayan kim, bir-birini qucaqlayıb öpən kim.
Sonra Həsənqulu Putinin teleqramını oxuyur:
- Əziz qaçqınlar! Vaxtilə bir gözəl mahnınız vardı: "Ay mənim urus qardaşım, ay mənim urus bacım". Elə bilirsiz biz bu mahnını yaddan çıxarmışıq? İndi biz də bir mahnı yazırıq: "Ay mənim azərbaycanlı qardaşım, ay mənim azərbaycanlı bacım". Sizlər bizim üçün çox əzizsiniz. Urus torpaqlarını alman faşizmindən xilas etmək üçün həlak olan dörd yüz mindən çox azərbaycanlını biz heç vaxt unuda bilmərik. Biz sizsiz yaşaya bilmərik. Ən azı ona görə ki, sizlər olmasanız, ölkəmizdə doğum faizi minusa işləyər. Bizim dostluğumuz əbədidi, ona görə də biz heç də amerikalılar və fransızlar kimi ATƏT-in əlli illiyini yox, yüz illiyini görmək arzusuyla yaşayırıq. Sizə söz verirəm ki, ATƏT-in yüz illiyində Moskvadakı Qızıl meydanda möhtəşəm bir parad keçirəcəyik. Yaxın qonşu uzaq qohumdan yaxşıdı. Biz sizi amerikalılardan da, fransızlardan da çox sevirik. Yaşasın Rusiya ilə Azərbaycanın əbədi dostluğu!
İlahi, yenə sevincindən ağlayanlar kim, öpüşənlər kimi, "urra" deyənlər kim.
Mərasimin sonunda görkəmli ulduzlarımız geniş konsert proqramı ilə çıxış etdilər. Mərasim CNN kanalı ilə canlı yayımlanırdı.
Hörmətli oxucular! İstəsəniz bu povestin arxasını yaza bilərik. Siz istəsəniz! Məktublarınızı gözləyirik.
