Gələn il Polşa və Ukraynada keçiriləcək futbol üzrə Avropa Çempionatının seçmə mərhələsi üçün püşk atılıb. Bazar günü Polşanın paytaxtı Varşavada düzənlənən mərasimdə Azərbaycan yığmasının da rəqibləri məlum olub.
   
   Öncədən onu vurğulayaq ki, siyasi problemləri nəzərə alan və keçmiş səhvlərindən nəticə çıxaran UEFA Azərbaycanla Ermənistanı, Gürcüstanla isə Rusiyanı eyni qrupa salmamaq üçün önləyici tədbirlər görüb. Püşkatamaya gəlincə, təxminən 600 milyon insanın canlı yayımda izlədiyi mərasimdə Azərbaycan milli komandasının rəqiblərinə aydınlıq gəlib. Alman çalışdırıcı Berti Foqtsun yetirmələri "A" qrupunda mübarizə aparmalı olacaqlar. Özü də tanış rəqiblərlə. Püşk millimizi əvvəlki seçmə mərhələlərdə dəfələrlə görüşdüyümüz komandalarla yenidən üz-üzə gətirib.
   
   
   
   "A" qrupu
   
   
   
   Almaniya,
   
   Türkiyə,
   
   Azərbaycan,
   
   Avstriya,
   
   Belçika,
   
   Qazaxıstan
   
   
   
   Püşkatma mərasimində iştirak etmək üçün Varşavaya gedən yığmamızın baş məşqçisi Berti Foqts rəqiblərimizin adı məlum olandan sonra açıqlama verib: "Çox güclü qrupda mübarizə aparmalı olacağıq. Almaniya qrupumuzda favorit olsa da, Türkiyəni də hesabdan silmək olmaz". Almaniyalı futbol mütəxəssisi planlarından da danışıb: "Bütün komanda ilə seçmə mərhələnin görüşlərinə ciddi hazırlaşmalı, güclü təlim-məşq toplanışları keçirməliyik. Çalışacağıq ki, uğurlu nəticələr qazanaq və azarkeşlərimizə baxımlı oyun nümayiş etdirək".
   
   Qrupumuzun lideri sayılan Almaniya yığmasının baş məşqçisi Yoahim Löv artıq Avropa Çempionatının final mərhələsi barədə düşündüyünü gizlətməyib: "Açığı, püşk məni təəccübləndirmədi. Türkiyə ilə birgə qrupumuzun favoritləriyik. Buna görə də indidən final mərhələsi barədə düşünürəm". Löv Azərbaycanda və Qazaxıstanda oyun keçirməyin çətinliyini də vurğulayıb.
   
   "A" qrupundakı oyunların təqvimi fevralın 18-də dəqiqləşəcək. Baş məşqçilər və milli federasiyaların nümayəndələri həmin gün Almaniyanın Frankfurt şəhərinə toplaşaraq bu məsələyə aydınlıq gətirəcəklər. Seçmə mərhələnin oyunlarına bu ilin sentyabrında start veriləcək.
   
   2011-ci ilin noyabrında isə Avropa Çempionatına vəsiqə qazanan milli komandaların adları məlum olacaq.
   
   
   
   

"Çelsi" klubunun sahibi, rusiyalı iş adamı Roman Abramoviçlə dost olan azərbaycanlı biznesmen Mübariz Mənsimov mövsümün sonunda ingilis klubundan "Beşiktaş"a ulduz futbolçu gətirəcəyini bəyan edib. "Fanatik"in yaydığı məlumata görə, o, Deko, Maluda və ya Kalu kimi ulduzlardan birini "Qara qartal"ın heyətinə qatmağı düşünür. ""Beşiktaş"a bir dünya ulduzu hədiyyə edəcəm", - deyə Mənsimov bildirib: ""Çelsi"nin sahibi Abramoviçlə yaxın dostuq. Həm birgə iş görürük, həm də yaxın münasibətlərdəyik. Mövsümün əvvəlində Dekunu "Beşiktaş"a gətirmək üçün mənə yardım etməsini istəmişdim. Lakin klubun baş məşqçisi dəyişdikdən sonra futbolçu da orada qalmaq istədi və bu səbəbdən transfer alınmadı. İndi vəziyyət fərqlidir. Yeni mövsümdə "Çelsi"dən dünya ulduzu olan futbolçulardan birini "Beşiktaş"a gətirəcəyik".
   
   Türkiyə mətbuatı Deku, Maluda və Kalu arasında seçim ediləcəyini, Kalunun digər futbolçularla müqayisədə İstanbula gətirilmə şanslarının daha çox olduğunu yazır.
   
   

Azərbaycan qrossmeysterləri Vüqar Həşimov, Şəhriyar Məmmədyarov və Teymur Rəcəbov Həştərxan Qran-Prisində iştirak edəcəklər. Turnirə ümumilikdə 11 zəka sahibi qatılacaq.
   
   Şahmatçılarımızın rəqibləri Boris Qelfand (İsrail), Ruslan Ponomaryov (Ukrayna), Vasili İvançuk (Ukrayna), Van Yue (Çin), Pyotr Svidler (Rusiya), Peter Leko (Macarıstan), Dmitri Yakovenko (Rusiya), Pavel Elyanov (Ukrayna), Yevgeni Alekseyev (Rusiya), Vladimir Akopyan (Ermənistan) və Ernesto İnarkiyev (Rusiya) olacaqlar. Xatırladaq ki, yarış mayın 9-dan 25-dək keçiriləcək.

Növbəti turun oyunları bu gün keçiriləcək
   
   Ötən həftə ölkə ərazisində hökm sürən qarlı hava şəraiti futbol üzrə milli çempionatın gedişinə də təsirsiz ötüşməyib. Bazar gününə planlaşdırılan XIX turun bütün görüşləri təxirə salınıb.
   
   UNİBANK premyer-liqasının təşkilinə cavabdeh qurum - Peşəkar Futbol Liqası təqvimdə dəyişiklik etmək məcburiyyətində qalıb. Turun oyunları bu gün keçiriləcək. Əsas görüş isə "Neftçi" və "Bakı" arasında qarşılaşma hesab edilir.
   
   PFL XX turun bütün oyunlarını fevralın 13-nə təyin edib. XXI tur da başqa vaxtda keçiriləcək. Həmin tur qarşılaşacaq klublar fevralın 17-də meydana çıxacaqlar.