Rasim Musabəyov: "Ermənilər qorxur ki, bu gün çərçivə müqaviləsinə imza atsalar, sabah da onları konkret addımlar atmağa məcbur edəcəklər"
Politoloq Rasim Musabəyov "Stratfor" Araşdırma Mərkəzinin və ABŞ Milli Kəşfiyyat İdarəsinin rəhbərinin Dağlıq Qarabağda silahlı münaqişənin yenidən alovlana biləcəyi barədə açıqlamalarını şərh edib. Politoloq bildirib ki, "Sratfor" Amerika kəşfiyyatına yaxın bir tədqiqat mərkəzi sayılır. Ona görə də onların yaxın mövqedən çıxış etməsi gözləniləndir. "O ki qaldı ABŞ Dövlət katibinin müavini Ceyms Steynberqin Cənubi Qafqaza səfərinə, bunun hansısa müharibə ehtimalının gündəlikdə dayanması ilə bağlı olduğunu düşünmürəm. Çünki Steynberq həm Ermənistanda, həm Gürcüstanda görüşlər keçirəcək. Regionla bağlı müzakirə olunası çoxlu məsələlər var" - deyə politoloq bildirib.
"Bir tərəfdən biz həmişə narahatıq və böyük dövlətlərə deyirik ki, Qarabağın işğalı ilə əbədiyyən barışacağımızı düşünməsinlər. Çalışırıq ki, Minsk Qrupunun həmsədr ölkələrində bir narahatlıq yaransın, hərəkətə keçsinlər. Onlar hərəkətə keçəndə isə fikirləşirik ki, görəsən, bunun arxasında nə dayanır?" - deyə R.Musabəyov əlavə edib. Politoloq Milli.Az xəbər portalına açıqlamasında söyləyib ki, əvvəllər elə başa düşülürdü ki, Azərbaycan rəhbərliyinin müharibə ilə bağlı sərt açıqlamaları daxili auditoriyaya hesablanan ritorikadır: "Amma sonra ordu quruculuğundakı ciddi işləri, müəyyən sistemli hazırlıqları görəndə, bu açıqlamaları ciddiyə almağa başladılar. Anladılar ki, doğrudan da Azərbaycan Qarabağın işğalı ilə barışmayacaq" - politoloq əlavə edib.
R.Musabəyovun fikrincə, həmsədr ölkələr Ermənistanı özlərinə daha yaxın hesab edirlər, ona görə də özümüzü aldatmaq lazım deyil: "Həmsədrlər danışıqlarda ermənilərin bütün iddialarının olmasa da, əksəriyyətinin təmin olunmasına, bu münaqişədən onların daha qazanclı çıxmasına nail olmağa çalışırlar. Azərbaycan da razılaşmır deyə, münaqişə bu günə qədər həllini tapa bilmir".
Türkiyənin baş naziri Rəcəb Tayyib Ərdoğanın son günlərdə həmsədr ölkələrin ünvanına sərt ittihamlarını şərh edərkən politoloq bildirib ki, Ermənistanın cılız və dilənçi bir dövlət olduğu hamıya bəllidir: "Həmsədr ölkələr bir tərəfdən işğalçı Ermənistana maliyyə yardımı edir, silah verir. Digər tərəfdən deyirlər ki, biz Ermənistana təzyiq edə bilmərik. Türkiyənin də, Azərbaycanın da tələbi budur ki, böyük dövlətlər regionda daha pis nəticələrin yaranmasını istəmirlərsə, əllərində olan bütün təzyiq imkanlarından istifadə edib Ermənistanı öz yerində oturtmalıdırlar. Əks halda, onların arzulamadıqları ən pis variantlar baş verə bilər və bundan hamı zərər görəcək".
Dağlıq Qarabağ münaqişəsi ilə bağlı danışıqların son raundu barədə fikirlərini bölüşən R.Musabəyov bildirir ki, hazırda söhbət çərçivə müqaviləsindən gedir və burada detallar yox, ümumi məsələlərin razılaşdırılması gündəmdədir: "Yəni, Ermənistanın işğal etdiyi torpaqlardan çəkilməsi bildirilir, amma bunun nə vaxt, necə və hansı formada olacağı göstərilmir. Bu isə məsələnin daha da uzadılması deməkdir. Ermənilər isə qorxur ki, bu gün çərçivə müqaviləsinə imza atsalar, sabah da onları konkret addımlar atmağa məcbur edəcəklər. Odur ki, imzalamırlar. Belə vəziyyət böyük dövlətlərin maraqlarına cavab verir. Amma münaqişənin həlli prosesinin uzadılması Azərbaycana sərf etmir. Bizə işğal olunmuş torpaqlarımız lazımdır, kağız parçası yox!" - deyə Musabəyov qeyd edib.
Azərbaycan prezidenti İlham Əliyev fevralın 4-də Almaniya Federativ Respublikasına işgüzar səfər edib. APA-nın məlumatına görə, Berlinin "Tegel" hava limanında dövlət başçısını Almaniyanın yüksək vəzifəli rəsmi şəxsləri qarşılayıblar. 
"Xocalı hadisələri İslam Konfransı Təşkiatının iclası zamanı qəbul olunmuş bəyanata baxmayaraq, İKT-yə üzv ölkələr tərəfindən soyqırım kimi tanınmayacaq". Bunu Ermənistan xarici işlər naziri Edvard Nalbandyan deyib. 
"Mən nazir olanda həmişə kəskin tənqidlərə məruz qalırdım. Həmişə deyirdim ki, heç bir halda Rusiya ilə əlaqələri kəsmək olmaz və mədəniyyətlərin yaxınlaşdırılması yolunu davam etdirmək lazımdır. Çünki biz yenə də eyni coğrafi məkanda yerləşirik". 
Prezident yanında Qeyri-Hökumət Təşkilatlarına Dövlət Dəstəyi Şurasının elan etdiyi müsabiqəyə 489 layihə daxil olub. APA-nın xəbərinə görə, bu barədə sözügedən şuranın sədri Azay Quliyev jurnalistlərə açıqlamasında bildirib. Onun sözlərinə görə, artıq müsabiqəyə sənəd qəbulu baş çatıb və texniki ekspertiza keçirilib: "80-dən artıq təşkilatın təqdim etdiyi layihələr ekspertizadan keçməyib. Bu o deməkdir ki, onların sənədlər geri qaytarılacaq". 
