Düünən İranın Azərbaycandakı səfirliyinin Mədəniyyət Mərkəzi tərəfindən hazırlanan "Məhəmməd Füzulinin qəzəllərinin şərhi" kitabının təqdimatı keçirilib. APA-nın xəbərinə görə, tədbirdə çıxış edən İranın Azərbaycandakı səfirliyinin Mədəniyyət Mərkəzinin rəhbəri İbrahim Nuri Məhəmməd Füzulinin Azərbaycan xalqının dəyərli və dünya şöhrətli şairi olduğunu deyib. O Füzulinin elmi-mənəvi dəyərlərə malik olmasından söz açaraq bildirib ki, şairin öz ana dilindən başqa, fars, ərəb dillərində qəzəllər yazması onu bütün şərq aləmində sevdirib. İ. Nuri Füzulinin qəzəllərinə şərhin 2-ci və 3-cü cildinin də yaxın günlərdə hazır olacağını bildirib.
   
   İran ali dini rəhbərinin Azərbaycandakı nümayəndəsi Seyid Əli Əkbər Ocaq Nejad təqdimat mərasimində çıxış edərək Füzulinin ürfani şair olduğunu və onun qəzəllərinin məna və məfhum cəhətindən olduqca dərin olduğunu deyib. O bildirib ki, Füzulinin bu gün anılmasının səbəbi onun ilahi və mənəvi bir şair olmasıdır: "Hazırda Füzuli yaradıcılığı bütövlüklə açılmayıb. Məhəmməd Füzuli şerin ən gözəl nümunələri olan əsərləri ilə ədəbi-bədii dilimizi yüksəkliklərə qaldırmış, klassik Azərbaycan, habelə digər türk xalqlarının poeziyasına misilsiz təsir göstərən ədəbi məktəb yaratmış dahi şair və mütəfəkkirdir".
   
   Tədbirdə çıxış edən akademik Vasim Məmmədəliyev, professorlar Şahin Fazil, İmamverdi Həmidov və Füzulinin qəzəllərinin şərhini yazan İranlı şair Əsgər Şahi Füzuli yaradıcılığı barədə danışıblar.