Azərbaycan İqtisadi İnkişaf və Kənd Təsərrüfatı nazirlikləri, həmçinin Azərbaycanda İxracın və İnvestisiyaların Təşviqi Fondunun (Azpromo) işçilərindən ibarət nümayəndə heyəti Berlində (Almaniya) keçirilən "Beynəlxalq Yaşıl Həftə - 2010" sərgisində iştirak edib.
   
   İqtisadi İnkişaf Nazirliyindən "APA-Economics"ə verilən məlumata görə, 1926-cı ildən başlayaraq hər il keçirilən sərgidə kənd təsərrüfatı və yeyinti sənayesi məhsulları nümayiş etdirilir. Avropanın ən iri sərgisi hesab olunan "Beynəlxalq Yaşıl Həftə"də Azərbaycan 3-cü dəfə iştirak edib. Sərgidə Azərbaycanı adıçəkilən dövlət qurumları ilə yanaşı 10-dan çox şirkətin nümayəndələri təmsil edib. Azərbaycan şirkətlərinin "Beynəlxalq Yaşıl Həftə - 2010" sərgisində nümayiş olunan məhsullar iştirakçılar, eləcə də sahibkarlar tərəfindən maraqla qarşılanıb.
   
   Görülmüş tədbirlər nəticəsində səərgidə iştirak edən Ermənistanın məhsullarının paylanmasının qarşısı alınıb. Çünki adıgedən ölkəyə məxsus məhsulların üzərindəki etiketlərdə Qarabağ ərazisi "Artsax" adı altında təqdim edilirdi. Vaxtında həmin hissə kəsilərək götürüldü və erməni şirkətlərinin növbəti təxribatçı hərəkətinin qarşısı beləcə alındı.