Bakıda tikintidə ölüm hadisəsi baş verib. Bu barədə APA-ya Nəsimi rayon Prokurorluğundan məlumat verilib. Hadisə fevralın 2-si, axşam saat 19.30 radələrində "Paşa İnşaat"a məxsus, tikilməkdə olan 17 mərtəbəli binada qeydə alınıb.
   
   Tikintidə quraşdırılmış dəmir lövhələrin uçması nəticəsində həmin binada fəhlə işləyən, 1981-ci il təvəllüdlü Rəfael Əmirağa oğlu İsrafilov dəmir konstruksiyaların altında qalaraq dünyasını dəyişib. Faktla bağlı Nəsimi rayon Prokurorluğu tərəfindən araşdırma aparılır.

Türkiyə vətəndaşı Bakının Xətai rayonunda dəm qazından boğularaq ölüb. Bu barədə APA-ya Xətai rayon Prokurorluğundan məlumat verilib.
   
   Hadisə fevralın 2-si axşam saatlarında qeydə alınıb. Xətai rayonu, Z. Yusifov küçəsində yaşayan, Türkiyə Respublikasının vətəndaşı, 1983-cü il təvəllüdlü Ahmet Günaydın Müzəffər oğlu yaşadığı evdə dəm qazından boğulub. Onun meyiti hadisə baş verəndən bir neçə saat sonra hamamda aşkarlanıb.
   
   Faktla bağlı Xətai rayon Prokurorluğu tərəfindən araşdırma aparılır.

Abşeron rayonunun Xırdalan şəhərində tikintidə partlayış olub. Bu barədə APA-ya Abşeron rayon Polis Şöbəsindən məlumat verilib.
   
   Hadisə dünən Xırdalan şəhəri, 28-ci məhəllədə, "Viləş" MMC-yə məxsus yeni tikilən 5 mərtəbəli binada baş verib. Tikintidə istifadə olunan oksigen balonunun partlaması nəticəsində orada işləyən fəhlələr - 1984-cü il təvəllüdlü Şamil Abbasov, 1985-ci il təvəllüdlü Röyal İsmayılov və 1973-cü il təvəllüdlü Mirəli Abdullayev müxtəlif dərəcəli bədən xəsarətləri alıblar. Xəsarət alanlar xəstəxanaya yerləşdirilib.
   
   Faktla bağlı araşdırmalar aparılır.