Dekabrın 23-də Naxçıvan Muxtar Respublikasında 7 seçki dairəsini əhatə edən 316 seçki məntəqəsi üzrə keçirilən bələdiyyə seçkilərində 171 bələdiyyəyə 1437 üzv seçilib. APA-nın xəbərinə görə, bu barədə Naxçıvan MR Mərkəzi Seçki Komissiyasının yaydığı məlumatda bildirilir. Tərtib olunmuş 316 məntəqə seçki komissiyası və 171 dairə seçki komissiyasının yekun protokolları heç bir nöqsan və irad bildirilmədən qəbul edilib. Seçkilərin nəticələri rəsmi surətdə elan olunduqdan sonra ilk iclaslar keçirilib, seçilmiş bələdiyyə üzvlərinin hər biri xüsusi hazırlanmış vəsiqələrlə təmin olunub.
   
   Seçilmiş 171 bələdiyyə sədrinin 82 nəfəri (48%) ali təhsilli, 39 nəfər (22,8%) orta ixtisas təhsilli, 50 nəfəri isə (29,2%) orta təhsillidir. Partiya mənsubiyyətinə görə bələdiyyə sədrlərinin 150 nəfəri (87,7%) YAP üzvü, 18 nəfəri (10,5%) bitərəf, 3 nəfəri (1,8%) Böyük Quruluş Partiyasını təmsil edənlərdir. Bələdiyyə sədrlərindən 163 nəfəri, (95,3%) kişi, 8 nəfəri (4,7%) qadındır.