Ölkəmiz Yunan-Roma güləşi üzrə Ermənistanda keçiriləcək Dünya Kubokundan rəsmi şəkildə imtina edib. Bu haqda məlumatı "Novosti-Armeniya"ya turnirin mətbuat katibi Eduard Kələntəryan bildirib. Ermənistan Güləş Federasiyası Beynəlxalq Güləş Federasiyaları Assosiasiyasından (FİLA) məktub alıb. Sənəddə Azərbaycan yığmasını Dünya Kubokunda Özbəkistanın əvəzləyəcəyi göstərilib.
   
   Kələntəryanın sözlərinə görə, Azərbaycan tərəfi iki gün davam edəcək yarışdan imtinasına səbəb kimi 13 - 18 apreldə Bakıda keçiriləcək Avropa çempionatına daha yaxşı hazırlaşmaq istəyini göstərir. O, həmçinin FİLA-nın buna görə Azərbaycan Güləş Federasiyasına heç bir intizam sanksiyası tətbiq etməyəcəyini açıqlayıb. Xatırladaq ki, Dünya Kubokunda Türkiyə, İran, Rusiya, Gürcüstan, Ermənistan, Kuba və Macarıstan da mübarizə aparacaq.
   
   
   
   

Rusiyada idmanın müxtəlif növləri üzrə ötən ilin ən yaxşıları müəyyənləşib. 2009-cu il Rusiyada ən yaxşı boksçusu adına Denis Lebedev layiq görülüb. Boksçunun WBO İnter-Continental kəməri uğrunda həmyerlimiz Əli İsmayılovla döyüşü isə ilin görüşü seçilib. İnter-Continental kəmər uğrunda döyüşün təşkilatçısı olan "JAB Promotion" ilin promouter şirkəti seçilib.
   
   Xatırladaq ki, Əli İsmayılovla Denis Lebedev arasındakı döyüş rusiyalı boksçunun texniki nokautla qələbəsilə yekunlaşmışdı.

Bakıda keçiriləcək Yeniyetmələrin I Yay Olimpiya Oyunlarına lisenziya xarakterli gənclər arasında dünya çempionatı ilə əlaqədar Təşkilat Komitəsi yaradılıb. Bu haqda Lent.az-a Azərbaycan Boks Federasiyasının (ABF) I vitse-prezidenti Ağacan Abiyev məlumat verib. Onun sözlərinə görə, Təşkilat Komitəsinə ABF-nin prezidenti, fövqəladə hallar naziri Kəmaləddin Heydərov rəhbərlik edir. Aprelin 20-də start götürəcək yarışa 400-dək idmançı və 300-dən çox məşqçi, müxtəlif ölkələrin digər nümayəndələri, hakimlər, Beynəlxalq Həvəskar Boks Assosiasiyasının (AİBA) rəsmiləri və digər qonaqların qatılacağı gözlənilir. Qonaqlar üçün ayrılan 5 mehmanxananın siyahısı və dünya çempionatının keçiriləcəyi "Sərhədçi" Olimpiya Mərkəzi haqda məlumat AİBA-ya təqdim olunub.
   
   Abiyev bildirib ki, boksun zəif inkişaf etdiyi ölkələrdən 55 gənc idmançı və 10 məşqçi "Bakıya yol" proqramı çərçivəsində yarış öncəsi AİBA-nın hesabına ölkəmizdə təlim-məşq toplantısı keçirəcək. 16 günlük hazırlıq prosesinin Lənkəran Olimpiya Kompleksində təşkili nəzərdə tutulub. Həmin boksçular Bakıdakı dünya çempionatına da qatılacaqlar. Bundan sonra AİBA onların arasından 5-ini seçəcək və bu il Sinqapurda keçiriləcək olimpiadaya güzəştli vəsiqə verəcək. Dünya çempionatına aprelin 30-da yekun vurulacaq.
   
   

Müdafiəçilər - Elvin Beqiri ilə Tixon Şişovun ardından "Xəzər Lənkəran" daha bir futbolçu - braziliyalı Kristian Martins Kabralla anlaşıb. Lənkəran klubunun rəsmi internet saytında yer alan məlumata görə, bu gün 30 yaşlı cənubi amerikalı ikiillik müqaviləyə imza ataraq, karyerasında ilk dəfə legioner həyatı yaşayacaq.
   
   Hücumçuların arxasında - pleymeyker mövqeyində oynayan Kristian daha öncə Braziliya çempionatının "A" seriyasında ünlü "Palmeyras"ın şərəfini qoruyub. "Parana", "Nautiko" və "Vitoria"nın heyətində də çıxış edən təcrübəli futbolçu son altı ayı Braziliyanın "B" seriyasında yarışan "Fortaleza"nın heyətində keçirib.
   
   Kristianın gəlişi ilə "Xəzər Lənkəran"dakı braziliyalıların sayı dördə çatıb. Ona qədər "ağ-yaşıl" formanı Mario Souza, Junior Osvaldo və Dieqo Souza da daşıyırdı.
   
   
   
   

Azərbaycanın "Olimpik-Şüvəlan" futbol klubu qış transfer fəaliyyətini başa çatdırıb. Kubun mətbuat xidmətindən verilən məlumata görə, rəhbərlik transferə çıxarılan 5 futbolçuya layiqli əvəzləyici taparaq, heyətin komplektləşdirilməsi prosesini yekunlaşdırıb. Baş məşqçi Nazim Süleymanovun təklifi əsasında lazımi mövqelər üzrə 4 yeni oyunçu dəvət olunub. Bu məqsədlə komanda serbiyalı Mirko Bunyevceviçi Bakıya gətirərək onunla müqavilə bağlayıb.
   
   Antalyada baxışdan keçirilən və Rumınyanın "İnternasional" klubu ilə oyunda sınaqdan uğurla keçən Bunyevceviç yarımmüdafiəçidir. 1978-ci il təvəllüdlü serbiyalı futbolçu peşəkar karyerasına ölkəsinin "İM Rakovika" klubunda başlayıb. Daha sonra Belqradın "Rad" və "Srvena Zvezda" klublarında forma geyinib.
   
   2001-ci ildə ölkəni tərk edərək, Sloveniyaya üz tutub. 2001-2004-cü illərdə həmin ölkədə "Koper" və "Mura"da çıxış edib. 2004-cü ildə yollandığı Ukraynada üç il ərzində "Arsenal" (Kiyev) və "Zarya"nın formasını geyinib. 2006-cı ildə vətəninə dönən Mirko bir il "Hayduk"un uğurları üçün çalışaraq, yenidən Ukraynaya üz tutub. Bir mövsüm "Zarya"nın heyətində yer alan futbolçu 2009-cu ili Serbiya çempionatının autsayderi olan "Çukariçka"da keçirib.