Bu ilin may ayında Osloda keçiriləcək "Eurovision-2010" mahnı yarışmasına göndəriləcək müğənni və ya qrupun seçilməsi üçün milli yarımfinal bugün "Buta Palace"da təşkil ediləcək. Yarımfinal konsertində final uğrunda mübarizə aparacaq 6 namizəd - Ülviyyə Rəhimova, Məryəm Şabanova, Elli Miçiyeva, Azad Şabanov, Səfurə Əlizadə və "Milk&Kisses" qrupu yeni mahnı ilə səhnəyə çıxacaqlar. İfa olunacaq bütün mahnılar ingilis dilindədir.
   
   Ülviyyə Rəhimova "İn love" ("Vurulmaq") adlı oxuyacağı mahnının sözlərini özü yazıb, bəstəkarı isə Sergey Quliyevdir. Ülviyyənin imici ilə Validə Abbasova məşğul olur.
   
   Məryəm Şabanova isə sözləri və musiqisi özünə məxsus olan "İ"ve had enough" ("Məndən bu qədər") adlı ritmik mahnı ifa edəcək, Onun səhnədə "Spayder" şou-balet qrupu müşayiət edəcək.
   
   Elli Miçiyeva prodüseri İsa Məlikovun öz həyat yoldaşı Paulinaya aid "Up, up" ("Yüksəklərə, daha da yüksəklərə") adlanan mahnısını oxuyacaq. Ritmik mahnı ilə səhnəyə rəqqaslar da çıxacaq. Mahnıda ud, zurna və zərb alətlərindən istifadə olunub.
   
   Azad Şabanovun ifa edəcəyi "Smile" ("Təbəssüm") mahnısının sözləri Zəhra Bədəlbəyliyə, musiqisi Vasoya məxsusdur.
   
   Səfurə Əlizadə sözləri Günel Musayeva və Zəhra Bədəlbəyliyə, musiqisi Elvin Musayevə məxsus olan "Söz ver" adlı mahnı oxuyacaq. Mahnı həm Azərbaycan, həm də ingilis dilindədir. Səfurə ilə birlikdə səhnəyə "Nero" qrupu da çıxacaq.
   
   "Milk&Kisses" qrupunun ifa edəcəyi mahnının sözlərini qrup üzvləri Fəridə Nelson və Dilarə Kazımova, musiqisini Dilarə Kazımova və "Unformal" qrupunun üzvü kimi tanınan dj Vuper yazıb - "İ am on fire" ("Mən yanıram").
   
   Qeyd edək ki, yarımfinal konsertində 6 namizəddən 3-ü final mərhələsinə keçəcək. Yarımfinal Bakı vaxtı ilə saat 20:00-da başlayacaq. Gecədə "Eurovision-2004"-ün qalibi Ruslana, "Eurovision-2009"-un qalibi Aleksandr Rıbak və 2009-cu ilin 3-cüsü Aysel Teymurzadə çıxış edəcəklər. Konsert "Buta Palace"da təşkil ediləcək.