ABŞ artıq əsas dünya istehlakçısı rolunu yerinə yetirə bilmir. Belə bir bəyanatla Beynəlxalq Valyuta Fondunun direktoru Dominik Stross-Kan İsraildə keçirilən konfransda çıxış edib. Onun sözlərinə görə, bütün dünyada iqtisadi tendensiya baş qaldırdığından Birləşmiş Ştatları hansı ölkənin əvəz edəcəyi hələlik məlum deyil. O qeyd edib ki, hazırda dünya iqtisadiyyatı Asiyanın hesabına yenidən dirçəlməyə başlayıb. Lakin Qərbdəki inkişaf tendensiyaları hökumətin ayırdığı subsidiyalar hesabına gedir. Dominik Stross-Kan bu arada istehlak tələbatı artmayanadək sabit iqtisadi inkişaf haqda nəsə deməyin mümkün olmadığı söyləyib.
   
   "Böhranın təkrarlanmaması üçün ABŞ, Böyük Britaniya və digər ölkələr maliyyə sektorunda islahatları uyğunlaşdırmalıdır",- deyə D. Stross-Kan bildirib. O, böhrandan ethiyat edən ölkələri islahatların nizamlanmasında birgə çalışdıqlarını, lakin böhran səngiməyə başladıqdan sonra təkbaşına fəaliyyət göstərməyə meyl etdiklərini vurğulayıb. Onun sözlərinə görə, bu şəkildə işləmək düzgün deyil, əməkdaşlıq etməyi öyrənmək lazımdır. "Dünya miqyasında heç bir tədbir görməmiş böhrandan qurtulmaq real deyil. Anti-böhran proqramlarına keçmək hələlik tezdir, çünki hələ də təkrar böhran təhlükəsi mövcuddur",- deyə BVF-in direktoru bildirib.