İran İslam Respublikasından Naxçıvan Muxtar Respublkasına qaçaqmalçılıq yolu ilə narkotik vasitə keçirməyə cəhd edən şəxslər saxlanılıb. APA-nın Naxçıvan MR Dövlət Gömrük Komitəsinin məlumatına istinadən xəbərinə görə, İİR-dən qayıdan 1969-cu il təvəllüdlü Cəfərov İsmayıl Əli oğlunun yükləri arasında taxtadan düzəldilmiş iki şəkil lövhəsinə baxış keçirilərkən lövhələrin hər birində xüsusi qaydada gizlədilmiş iki bağlama olmaqla, ümumilikdə, 4 bağlama, çəkisi 2 kiloqramdan artıq toz şəklində narkotik vasitə aşkarlanıb.
   
   Araşdırmalar zamanı İ. Cəfərovun qohumu Şərur rayon Xələc kənd sakini 1971-ci il təvəllüdlü Məmmədov Fəqani Ağalar oğlu ilə cinayət əlaqəsinə girdiyi müəyyənləşdirilib. Saxlanılanların dindirilməsi zamanı F. Məmmədovun əvvəllər də əlbir halda qaçaqmalçılıqla məşğul olduğu məlum olub. Faktla bağlı Naxçıvan MR Dövlət Gömrük Komitəsinin İstintaq və təhqiqat şöbəsi tərəfindən Cinayət Məcəlləsinin 206.2 (qaçaqmalçılıq yolu ilə narkotik vasitələrin gömrük nəzarətindən kənar və ondan gizli keçirilməsi) maddəsi ilə cinayət işi açılıb, araşdırmalar davam etdirilir.