Ermənistan Silahlı Qüvvələri işğal altında saxlanan Azərbaycan torpaqlarında yenidən irimiqyaslı hərbi təlimlərə başlayıblar. APA-nın Qarabağ bürosunun məlumatına görə, Ağdamın işğal altında olan yaşayış məntəqələrindən poliqon kimi istifadə edən ermənilər nəzarət etdikləri ərazidə yerləşən Şahbulaq dağının ətəklərinə təlim-məşğələ məqsədilə artilleriya zərbələri endirir.
   
   Təlim zamanı ağır artilleriyadan istifadə olunur. Mərmi partlayışlarının səsi Ağdam rayonu ərazisində və qonşu rayonların əraziyə yaxın kəndlərində də açıq-aydın eşidilir.

Fevralın 4-5-də Bakıda İqtisadi Əməkdaşlıq Təşkilatı ölkələrinin səhiyyə nazirlərinin I iclası keçiriləcək. Bu barədə APA-ya Səhiyyə Nazirliyinin mətbuat xidmətindən bildirilib.
   
   Tədbir fevralın 4-də səhər ümummilli lider Heydər Əliyevin və akademik Zərifə Əliyevanın məzarının, Şəhidlər Xiyabanının ziyarəti ilə başlayacaq. Daha sonra "Hyatt Regensy" otelində İƏT səhiyyə nazirlərinin toplantısı başlayacaq. Toplantı iki gün davam edəcək. İclasa quruma üzv dövlətlərin səhiyyə nazirlərinin qatılması gözlənilir.

Yanvarın 29-da Nyu-Yorkun NYMEX əmtəə birjasında keçirilən ticarət əməliyyatlarının gedişində WTI neftinin ixracına dair mart müqaviləsinin dəyəri 0,75 dollar və ya 1% azalaraq 1 barelə görə 72,89 dollar təşkil edib. "APA-Economics"in məlumatına görə, yanvarın 29-da ICE London qitələrarası birjasında martda ixrac etməklə Brent markalı neftin 1 barelinin dəyəri isə 0,67 dollar azalaraq 71,46 dollar təşkil edib.
   
   Neftin ucuzlaşmasının əsas səbəbi kimi dolların möhkəmlənməsini qeyd etmək olar. Belə ki, yanvarın 29-da dünya bazarlarında dollar avroya qarşı 0,5%, funt sterlinqə qarşı isə 1,2% bahalaşıb.

Ermənistan Silahlı Qüvvələrinin bölmələri yanvarın 31-də saat 11.00-dan 11.10-dək Goranboy rayonunun Tapqaraqoyunlu kəndi yaxınlığında yerləşən mövqelərdən, saat 10.30-dan 10.35-dək, fevralın 1-də saat 00.25-dən 01.40-dək və 01.30-dan 01.40-dək Ağdam rayonunun Sarıcalı və Yusifcanlı kəndləri yaxınlığında yerləşən mövqelərdən, saat 03.40-dan 03.50-dək Tərtər rayonunun Qapanlı kəndi yaxınlığında yerləşən mövqelərdən Azərbaycan Silahlı Qüvvələrinin üzbəüz mövqelərini avtomat və pulemyotlardan atəşə tutublar.
   
   Müdafiə Nazirliyinin mətbuat xidmətindən APA-ya verilən məlumata görə, bütün hallarda düşmən cavab atəşi ilə susdurulub, itki yoxdur.

Azərbaycan Vergilər Nazirliyinin bir sıra strukturlarının tərkib quruluşu, ştat vahidlərinin say və bölgüsündə dəyişiklik edilib.
   
    Bu barədə "APA-ECONOMICS"ə Vergilər Nazirliyindən məlumat verilib. Vergilər naziri Fazil Məmmədovun imzaladığı əmrlə Vergilər Nazirliyinin Bakı şəhəri Vergilər Departamentinin 1, 2 və 3 saylı fılialları ləğv edilib.
   
   Ləğv olunmuş filiallarının ştat vahidlərinin bir qismi hesabına Bakı şəhəri Vergilər Departamentinin "Vergi borclarının məcburi almması idarəsi", "Bəyannamələrin qəbulu və işlənməsi idarəsi" və "Vergi ödəyicilərinə xidmət idarəsi" yaradılıb. Həmçinin Vergilər Nazirliyi yanında Vergi Auditi Departamentinin yeni tərkib quruluşu, ştat vahidlərinin sayı və bölgüsü təsdiqlənib.

Beynəlxalq Qızıl Xaç Komitəsinin Ermənistan nümayəndəliyinin əməkdaşları İrəvanda əsirlikdə olan Azərbaycan ordusunun əsgəri Rafiq Həsənova baş çəkiblər. Bu barədə APA-ya BQXK-nın Azərbaycan nümayəndəliyinin mətbuat katibi Gülnaz Quliyeva bildirib.
   
   Onun sözlərinə görə, yanvarın 21-də baş tutan görüş zamanı R. Həsənovun saxlanma şəraitinin monitorinqi aparılıb, onunla təkbətək görüş keçirilib. R. Həsənovdan ailəsinə çatdırılmaq üçün məktub alınıb.
   
   G. Quliyeva məktubun artıq əsirin ailəsinə çatdırıldığını bildirib. R. Həsənovun atası Rəhman Həsənov isə APA-ya oğlu ilə bağlı heç bir açıqlama vermək istəmədiyini bildirib.

Müdafiə Nazirliyi mətbuat xidmətinin rəisi Eldar Sabiroğlu Daşkəsəndəki "N" saylı hərbi hissədə yaşanan qətliamla bağlı açıqlama yayıb. Açıqlamada deyilir: "Yanvarın 28-də Müdafiə Nazirliyinin "N" saylı hərbi hissəsində baş verən hadisənin nə dərəcədə ağır və üzücü olduğunun fərqindəyik. Hərbi qulluqçuların həlak olması hər şeydən öncə ordu üçün böyük itkidir. Nə etməli ki, artıq bu baş verib. İndi əsas söhbət olayın səbəblərinin müəyyən olunması, müqəssirlərin tapılaraq cəzalandırılmasından gedir. Bütün diqqət bu istiqamətə yönəlib. Müdafiə Nazirliyinin rəhbərliyinin göstərişi ilə hərbi hissəyə göndərilən komissiya bu günəcən orada çox gərgin iş aparır. İstintaqçılar da öz işlərini görməkdədirlər.
   
   Emosiyalara uymadan, təmkinlə hadisənin yekununu gözləməliyik. Lakin ictimaiyyətin fkirini çaşdırmaq, hadisənin mahiyyətinin açılmasına kömək etmək əvəzinə diqqəti başqa tərəflərə cəlb etmək xətti aydın görünür. Xüsusilə bəzi KİV-dərdə qərəzsizliyi şübhə doğuran yanaşmalar və mülahizələr özünə ardıcıl yer tapmaqdadır. Bu kimə lazımdır? Məgər belə bir mövqe sərgiləməklə konkret bir nəticə əldə etmək mümkündürmü? Əsla yox. Müxtəlif versiyalar və ehtimallar düşünmək olar. Ancaq onlardan hər hansı birini istintaq yekunlaşmadan həqiqət kimi qələmə vermək qətiyyən yolverilməzdir. Belə bir münasibət istintaq araşdırmasına da ciddi şəkildə maneəçilik törətmiş olur.
   
   Biz hamılıqla birlikdə istintaq prosesinin yekununu gözləməliyik. Vətəndaşlarımızın diqqətinə çatdırırıq ki, bu işin sonu mütləq olacaq. Kimlər günahkardır, kimlər acınacaqlı cinayət hadisəsini planlaşdırıb və nə üçün bu qanlı olay baş verib - hər şey aydınlaşacaq və təqsirkarlar öz cəzasına çatacaqlar.
   
   Bir məsələni yaddan çıxarmaq olmaz ki, mövqeyindən asılı olmayaraq Azərbaycan KİV-lərinin yaydığı hər bir məlumatı düşmən diqqətlə izləyir, təhlil edir və buna sevinməklə yanaşı özünəuyğun şəkildə faydalanır. Ona görə də düşmənə əlavə fürsət verməmək üçün çox diqqətli olmalıyıq".
   
   

Əbülfət MƏDƏTOĞLU
Bir anlıq illərin qanadında bu gündən, bu saatdan qopub ayrıldım. Və xəyal məni düz 21-22 il bundan öncəyə apardı. O yerlərə apardı ki, orada ayrı bir dünya var idi, ayrı bir həyat var idi. Elə bir dünya, elə bir həyat ki, onun müəyyən qayda-qanunlarını, müəyyən çalarlarını, müəyyən ab-havasını həsədlə yada salıram və onlara içimdə indi də bir dəli həsrət var... İlahi, bu necə həsrət, bu necə nisgil. Onu necə çözüm, onu necə yozum. Ümumiyyətlə, bu həsrətə dözmək özü-özlüyündə bir qəhrəmanlıq deyilmi? Məni qınamayın. Çünki "keçən günə gün çatmaz" deyənlər yanılmayıblar. Kim istəyir inansın, kim istəyir inanmasın. Şəxsən mən gələn günlərimi keçən günlərim üçün qurban verərdim. Bəlkə də düşünürsünüz ki, bu cağırılmış bayatıdı . Bilirik ki, gələcəyi keçmişə qurban vermək mümkün deyil. Ona görə də həmin arzunu dilə gətiririk. Amma nəyə inanırsınız, ona and içə bilərəm, mən gələn günlərimin nələr gətirəcəyini, hansı uğurları, hansı sevincləri bağışlayacağını gözümün önünə gətirmədən, onların barəsində düşünmədən arxada qalan günlərimi qurban verərəm. Ən azından ona görə ki, arxada qalanları artıq yaşamışam, onların dadını-tamını bilirəm və o daddan, tamdan doymamışam. Nə isə...
   
   Həyatın elə anları olur ki, özündən asılı olmadan onu olduğu kimi yaddaşına köçürürsən, olduğu kimi canında, qanında yaşatmağa çalışırsan. Çünki həmin an ondan sonra gələnlər üçün bir bünövrə, bir ip ucu olur və həmin o bünövrənin üzərində qarşıdakı günlərin çözümü başlayır... Kərpic-kərpic ucalır o özülün üzərində hördüklərimiz... Mən həyatımın bütün ağrı-acılarına baxmayaraq, bir çox mənada özümü xoşbəxt insanlardan sayıram. Çünki Tanrı mənə qələmə söykənmək, ürəyimdəkiləri pis-yaxşı necə bacarıramsa yazmaq imkanı verib. Və mən də o imkanın sayəsində ürəyimdəkiləri vərəqlərə köçürüb oxuculara, Azərbaycan insanına çatdırmaq yolu ilə həm həmsöhbətlər tapmışam, həm də həmfikirlər...
   
   Onunla ilk dəfə 1988-ci ildə rastlaşdım. Harda işlədiyini, nə işlə məşğul olduğunu bilmirdim. Filarmoniyanın yanındakı, qala divarlarının dibindəki çayxanada rastlaşdıq. Onun dostları sırasında mənim də tanıdığım, münasibətdə olduğum insanlar var idi. Məhz həmin insanların sayəsində bir-birimizə əl uzatdıq. Adını eşidəndə üz-gözümdən bir təbəssüm keçdi. Bilmirəm təzə tanışım bunu duydu, yoxsa yox, amma rəhmətlik həmkarımız Söhbət Səfərli sonralar mənə dedi ki, qardaşımla ilk tanışlığınızda nəyə sevindiyini göydə tutdum, sadəcə üstünü vurmadım. Gözlədim ki, özünüz doğmalaşanda o da bir sürpriz olsun. Mən mövzunu dərhal anladım və Söhbət Səfərlinin dediyi günü gözlədim.
   
   Bəli, o gözlədiyim gün mənim də taleyimə gəldi. Daha doğrusu, günlərin bir günündə artıq ömrünün ikinci ilinə qədəm qoymuş "Ədalət" qəzetində işə qəbul oldum. Təzə iş yerinin, təzə imzaların, təzə insanların arasında o da var idi.
   
   - Babək Yusif oğlu Abiyev!
   
   "Ədalət"in şöbə müdiri olan Babəklə münasibətlərimiz doğmalaşanda ailələrimizdən, övladlarımızdan danışarkən bildirdim ki, oğlum səninlə adaşdı. Gözləmədiym halda Babək Yusifoğlu həmin o ilk görüşümüzü xatırlatdı və özünəməxsus bir şəkildə vurğuladı ki, indi bildim ki, ilk dəfə rəhmətlik Söhbət Səfərli bizi tanış edəndə niyə üz-gözündən bir təbəssüm keçdi. O rəhmətlik də bunun səbəbini bu günə kimi mənə deməyib. İndi bu adaşlıq söhbəti özü-özlüyündə bəlli oldu.
   
   Qələm adamı ailəsində doğulmaq, qəzetin evə, ailəyə gətirdiyi sevinci, qayğıları əl boyda olan vaxtdan yaşamaq, sonra da məqsəd, məram kimi atanın yolunu tutub qəzetçi olmaq istəyi ilə yaşamaq hər övlada nəsib olmur. Babək isə rəhmətlik Yusif müəllimin təkcə əməllərini, xatirələrini yaşatmaq yox, həm də onun qələminin ömrünə ömür calamaq arzusunu da gerçəkləşdirdi. Bu gerçəkləşən arzu Babək Yusifoğlu imzasını Azərbaycan oxucusuna tanıtdı. Özü də qərəzsiz, gerçək bir şəkildə. Çünki qoşalaşan ata-oğul imzası təkcə yazı müəllifinin yox, həm də onun söykəndiyi, güvəndiyi bir ruhun da işığını, hərarətini özünə hopdurmuşdu və Babək müəllimin yazılarında oxucu hərarəti, səmimiyyəti, ən vacibi isə gerçəkliyi görüb duya bilirsən. Oxucuya lazım olan da elə gerçəklik və səmimiyyətdir.
   
   Arxada qalan illərdə bütün ağrı-acılarımızı birgə bölüşə-bölüşə bir-birimizin sevincinə, kədərinə şərik ola-ola övladlarımızla birlikdə özümüz də böyüdük. Daha doğrusu, övladlarımız böyüdü, biz yaşlaşdıq. Və bir də baxıb gördük ki, fevralın 2-di. İlk ağlımıza gələn Gənclər Günü oldu. Amma sonra baxıb gördük ki, biz gəncliklə sağollaşıb ayrılmışıq. Bəs onda 2 fevralı mənim üçün, Babəkin ailəsi üçün, dostları, doğmaları üçün əziz edən, xatırladan nədi? Bax elə bu sual da özü-özlüyündə məni yenidən uzaqlara çəkdi. Və düz beş il arxaya apardı məni. Biz - Nazim Ağamirov, Oqtay Salamov, Faiq Qismətoğlu, Rüstəm Hacıyev, Nizami Allahverdiyev, Ceyhun Rüstəmov, İlqar Məmmədli, Hidayət Elvüsal və mən nəşriyyatın 4-cü mərtəbəsində Babəkin 50 yaşını özümüzəməxsus şəkildə qeyd etdik. Məclisin ortasında o zamanlar qəzetimizin baş redaktoru olan millət vəkili Aqil Abbas da bu balaca mərasimə qatıldı.
   
   İndii də Babəkin 55 yaşı tamam oldu. Bilmirəm, yenə 4-cü mərtəbədə yığışacağıq, yoxsa yox, amma çox dəqiq bildiyim iki məqam var. Onlardan biri Babəkin jurnalist fəaliyyəti ilə, qələm ilə bağlıdı. Deməli, ötən illər, ötən aylar Babəkin qələmini öz yolundan sapdırmayıb. O yenə qələminə güvənir, yenə həmin qələmlə səmimi və gerçək düşüncələrini, arzularını, reallıqları oxucularına çatdırır. Şair demişkən: əlindədi hələ qələm!! Və qələminə də, sənətinə də, Babək Yusifoğlu imzasına da etibarı saxlamaqla sevgini də yaşadır, ömrünü uzadır.
   
   İkincisi, Babək Yusifoğlu ailəsinə də, nəvəsinə də, dostlarına da, eləcə də çalışdığı qəzetə də münsibətdə əvvəlki bütövlüyünü qorumaqda, yaşatmaqda davam edir. Necə deyərlər, onun üçün dəyişən illərdi. Sevgilər isə təzə tər...
   
   Bəli, bir anlıq gözümün önünə gətirdim 55 yaşı. Maşallah olsun!.. Ha istədim ki, ordakı beşlərin arasında bir üstə gələk işarəsi qoyum. Babəki çəkim aparım lap uşaqlığa. Gördüm gücüm çatmadı. Sonra fikirləşdim ki, bəlkə 55-dən beşini çıxım, ona də gücüm çatmadı. Çünki bu beş ildə Babək baba olub və ömrünün daha bir mənalı səhifəsini yaşamaqda davam edir. Mənim onun bu haqqını əlindən almaq ixtiyarım yoxdu. Deməli, ortada bir nəticə, bir yozum qalıb. O da beşin üstə beş də gəlsəm, 55-dən beş də çıxsam dəyişməyən, bütöv olan Babək Yusif oğlu Abiyevin maraqlı, mənalı və təkcə ailəsinə, dostlarına deyil, Azərbaycana da gərəkli olan ömür yoludu. Bu yolun uzanıb nəvələrə, nəticələrə doğru gedəcəyinə, sahibini, onun imzasını uzun-uzun illər oxucuya sevdirəcəyinə inamı var bizim ürəyimizdə. Kaş Allahın sevdiyi bəndələrindən saydığı Babək Yusifoğlu ömrünün istisini, hərarətini, sevgisini və jurnalist qələmini daha neçə-neçə onilliklərə qovuşdursun. Ondan sonra növbəti yubileylərin necə və harda keçirilməsi barəsində düşünərik.
   
   

Faiq QİSMƏTOĞLU
Çox vaxt avtobusa və mikroavtobusa minəndə insanların əlləri ürəyinin üstündə olur. Əlləri ürəyinin üstündə olur ki, görəsən, onlar mənzil başına sağ-salamat çata biləcəklər, ya yox?! Hər bir insan evindən çıxıb işə gedərkən ailənin gözü yola dikilir ki, o nə vaxt evinə qayıdacaq.
   
   Amma bu gün Bakıda və eləcə də məmləkətimizin digər yerlərində avtobus və mikroavtobusa minən insanların taleyi tükdən asılı vəziyyətdədir. Başqa sözlə demiş olsaq, həmin insanların həyatı o nəqliyyat vasitələrini idarə eləyən sürücülərdən asılıdır. Sürücülərin də Allah insafını kəssin. Avtobusun sükanı arxasında əyləşəndə elə bilirlər ki, dünyanın yiyələridi. Daha onlar fikirləşmirlər ki, avtobusda apardıqları kartof, soğan, tikinti materialları deyil, insandı. Qəribəsi də odur ki, sürücü də bir qədər təcrübəsiz olanda bax, onda çox ağır qəzalar baş verir.
   
   Təəssüf ki, hər gün də olmasa, tez-tez Bakıda və magistral yollarda avtobus sürücülərinin səhlənkarlığı üzündən ölümlə nəticələnən ağır qəzalar yaranır. Hansı ki, həmin avtobus sürücüləri xəttə çıxarkən onların sağlamlığından tutmuş idarə etdikləri nəqliyyat vasitəsinə qədər hər bir şey aidiyyatı təşkilatlar tərəfindən diqqətlə yoxlanılmalıdır. Və diqqətlə yoxlanıldıqdan sonra onların yol vərəqələrinə möhür vurulmalıdır. Bu möhür isə o deməkdir ki, avtobusu idarə edən sürücü bütün texniki tələbləri ödəyir, nəqliyyat vasitəsi sazdır və apardığı sərnişinlər üçün başı ilə cavabdehdir. Bəs əsl həqiqət necədir? Əsl həqiqət isə tamamilə başqa şeylərdən xəbər verir. Yəni sükan arxasında əyləşən avtobus sürücülərinin bir çoxu peşəkar deyil və eyni zamanda təcrübəsizdirlər. Hələ üstəlik xəttə çıxmamışdan öncə avtobuslar texniki baxışdan keçmir. Belə sürücülərin günahı üzündən isə ağır yol qəza hadisələri baş verir.
   
   Fevralın 1-də səhər saatlarında Bakı şəhərinin Binəqədi rayonu ərazisində iki sərnişin avtobusunun toqquşması nəticəsində çox ağır faciə baş verib. Belə ki, informasiya agentliklərinin yaydığı məlumata görə, qəza zamanı altı nəfər həlak olub, səkkiz nəfər isə müxtəlif dərəcəli bədən xəsarəti alıblar. Hər iki avtobusun sürücüsü - Rasim Seyfullayev və Ağabala Əhmədov elə hadisə yerində keçinib. Sərnişinlər - Minəxanım Quliyeva, Vilayət Məmmədov və başqa şəxsiyyəti məlum olmayan iki sərnişin də ağır qəza zamanı dünyasını dəyişib. Səhər saatlarında bu cür ağır faciənin baş verməsi avtobusun salonunda əyləşən digər sərnişinlərin də həyəcanlı anlar yaşamasına və şok keçirməsinə səbəb olub. Avtobusdakı bir çox sərnişinlər yanlarında əyləşən adamların al-qan içərisində olduğunu görəndə onların da halı pisləşib və ürəkləri gedib. Hadisə yerinə özünü çatdıran yol polisi əməkdaşlarının və təcili yardım xidməti həkimlərinin köməyi ilə ağır vəziyyətdə olan bir çox insanları ölümün pəncəsindən xilas edərək xəstəxanaya çatdırıblar.
   
   İlkin versiyaya görə, sərnişin avtobuslarının toqquşmasına əsas səbəb səhər saatlarında havanın həddindən çox dumanlı olmasıdır. Digər bir səbəb isə sürücülərin məsuliyyətsizliyi və qəza vəziyyəti yaranan zaman onların düşdükləri çətin şəraitdən çıxa bilməmələri ilə izah edilir. Hadisə yerində ilkin müayinə aparan ekspertlər və mütəxəssislər bildirirlər ki, qəzanın başvermə səbəblərini bu tezliklə müəyyənləşdirmək mümkün deyil. Ən azından ona görə ki, avtotexniki ekspertizadan və konkret istintaq hərəkətlərindən sonra ağır qəzanın baş verməsinə hüquqi qiymət veriləcək.
   
   Bütün hallarda bu cür yol-nəqliyyat hadisələrinin baş verməsinə sürücülər məsuliyyət daşıyırlar. Sürücülərin məsuliyyəti ilə yanaşı, həmin nəqliyyat vasitələrinin məxsus olduğu şirkətlərin sahibləri də bu cür hadisələrdən və ağır yol qəzalarından yaxalarını kənara çəkə bilməzlər. Ona görə ki, hər bir avtobus sürücüsü marşrut xəttinə çıxmamışdan öncə həmin şirkətin mühəndisləri və digər mütəxəssisləri tərəfindən yoxlanılır və bundan sonra onlar xəttə buraxılırlar. Üstəlik, hər hansı avtobus marşrutla hərəkət edərkən müxtəlif dayanacaqlarda onların hərəkətinə nəzarət edən dispeçerlər də var. Deməli, hər iki avtobusun belə bir ağır qəza törətməsində tək sürücü deyil, digər vəzifəli şəxslər də məsuliyyət daşıyırlar.
   
   Dəfələrlə yol polisi əməkdaşları müxtəlif televiziya kanallarındakı çıxışınlarında və eləcə də kütləvi informasiya vasitələrində bildiriblər ki, hava şəraitinin dumanlı, qarlı və buzlu olduğu günlərdə sürücülər diqqətli olmalı və hava şəraitinə uyğun sürət həddi seçməlidirlər. Yol polisi əməkdaşlarından biri dedi ki, çox güman ki, havanın qatı dumanlı olması ağır qəzanın baş verməsində böyük rol oynayıb. Amma bütün hallarda yenə sürücü məsuliyyət daşıyır. Gərək bu cür qatı dumanın olduğu səhər saatlarında hər iki avtobus sürücüsü hava şəraitinə uyğun sürət həddi seçməli və işıq sistemindən istifadə etməli idilər.
   
   Bir sözlə, bütün avtomobil sürücüləri sükan arxasında əyləşərkən diqqətli olmalıdılar. Sərnişin avtobuslarının sükanı arxasında əyləşənlər isə ikiqat məsuliyyətli olmalıdı. Göründüyü kimi, fevralın 1-də səhər saatlarında Bakıda dumanlı hava şəraitində hər iki sürücünün adi diqqətsizliyi ağır bir faciəyə gətirib çıxarıb. İndi bu faciə neçə ailəni və neçə insanı gözü yaşlı qoyub.
   
   İstər magistral, istərsə də şəhərdaxili yollarda dəfələrlə ölümlə nəticələnən çox ağır qəzalar baş verir. Təəssüf ki, bu cür ağır qəzalardan bir çox sürücülər nəticə çıxarmaq istəmir ki, istəmir. Sükan arxasında əyləşən sürücü də bu cür hadisələrdən nəticə çıxarmayanda bax, axırı da belə qanlı faciə ilə sona çatır.
   
   

Polşa XİN rəsmisi Ancey Çeşkovski "Gazeta Wyborcza"ya müsahibəsində Avropa İttifaqının Azərbaycanla viza rejimini sadələşdirmək barədə danışıqlara başlamaq niyyətində olduğunu bildirib. A. Çeşkovski "Şərq tərəfdaşlığı" layihəsinin Avropa İttifaqının digər təşəbbüslərinə nisbətən daha sürətlə inkişaf etdiyini bildirib.
   
   "Tərəfdaşlığın məqsədi postsovet məkanının 6 ölkəsinin Avropa İttifaqı ilə daha da yaxınlaşmasıdır. Prosesdə iştirak edən bütün qurumlar müvafiq proqramları həyata keçirirlər. Bu yaxınlaşma siyasi birlik, bu ölkələrin iqtisadiyyatlarının Avropa İttifaqına inteqrasiyası və orada Aİ standartlarının tətbiqi vasitəsilə həyata keçirilməlidir və sonda qarşılıqlı olaraq vizaların götürülməsinə gətirib çıxarmalıdır", deyə XİN rəsmisi qeyd edib.
   
   Çeskovski bildirib ki, Qafqaz ölkələri ilə assosiativ saziş imzalanmasına dair danışıqların üzərində iş gedir. "Hazırda biz danışıqların mandatının təsdiqlənməsini gözləyirik. "Şərq tərəfdaşlığı" başlamazdan əvvəl Avropa İttifaqında heç kim Azərbaycanla assosiativ sazişlər imzalamaq barədə düşünmürdü. İndisə bu şans reallığa çevrilib. "Şərq tərəfdaşlığı" Avropa İttifaqını şərqdəki qonşularla daha fəal əməkdaşlıq etməyə çağırır", deyə o vurğulayıb. Çeskovskinin bildirdiyinə görə, Avropa İttifaqı hazırda Gürcüstanla viza rejiminin sadələşdirilməsi barədə danışıqlar aparır və gələcəkdə Azərbaycanla da belə danışıqlar aparmaq niyyətindədir.
   
   

Nəqliyyat Nazirliyi Azərbaycanda sərnişin nəqliyyatı sürücülərinin yol hərəkəti qaydalarını tez-tez pozduğunu təsdiqləyir. Nəqliyyat Nazirliyinin ictimaiyyətlə əlaqələr şöbəsinin müdiri Namiq Həsənovun sözlərinə görə, sərnişin avtobusları sahibkarların istismarında olsa da, Nəqliyyat Nazirliyi sürücülərin peşəkarlığının artırılması üçün tədbirlər görür. Nazirliyin şöbə müdiri bildirib ki, 2008-ci ilin dekabrından başlayaraq, paytaxt Bakıda, eləcə də regionlarda sürücülərin peşəkarlıq səviyyəsinin artırılması üçün kurslar keçirilir.
   
   Bununla belə, Namiq Həsənovun sözlərinə görə, avtobus sürücülərinin yol verdikləri ciddi qayda pozuntularının, eləcə də bu səbəbdən baş verən qəzaların qarşısını almaq mümkün olmayıb: "Amma biz mübarizəni davam etdiririk. Ötən il avtobusların dayanacaqdan kənarda saxlanması ilə bağlı 5305 akt tərtib olunub. Bundan başqa, avtobusların sürücülük vəsiqəsi ilə idarə olunmaması ilə bağlı 111 fakt, müfafiq sürücülük kateqoriyası (D kateqoriyası) olmadan idarə olunması ilə bağlı 31 fakt, avtobusun idarəetmə üçün başqasına verilməsi ilə bağlı 14 fakr aşkarlanıb".
   
   Qeyd edək ki, bu gün Bakının Binəqədi yolunda iki sərnişin avtobusunun toqquşması nəticəsində 5 nəfər ölüb, 8 nəfər xəsarət alıb. Bakı Şəhər Dövlət Yol Polisi İdarəsinin şöbə rəisi Cəmşid Niftəliyev Trend News-a bildirib ki, 106 və 165 saylı avtobusların toqquşmasına yüksək sürət səbəb olub.
   
   

"Rusiyadan yan keçərək, Türkiyədən Avropaya uzanacaq "Nabucco" qaz kəməri Mərkəzi Asiya ölkələri qazını ixrac edəcək". "Kommersant" qəzeti yazır ki, layihənin təşəbbüskarı olan Avstriyanın OMV şirkəti bəyan edib ki, "Nabucco"nun rentabelli olması üçün ilkin mərhələdə onun Azərbaycan və İraq qazı ilə doldurulması nəzərdə tutulub.
   
   OMV 2015-ci ildən başlayaraq, kəmərlə Azərbaycanın "Şah Dəniz" yatağından ən azı 8 milyard kubmetr qazın nəqlinə ümid edir. Ümumilikdə isə "Nabucco"nun işə düşdüyü ilk mərhələdə Avropaya 17 milyard kubmetr qazın nəqli planlaşdırılır.

Mənə elə gəlir ki, bəşəriyyət müasirləşdikcə, onun həyat şəraiti modernləşdikcə, savadı, ağlı artdıqca daha təhlükəli olur.
   
   Kim nə deyir desin, mən əminəm ki, müasir dünyanın ən böyük bəlaları məhz digərlərindən daha çox inkişaf edən, daha mükəmməl silahlara sahib olan dövlətlərindən gəlir. Məhz onlar güclərindən, qüvvətlərindən sui-istifadə edərək digərlərini istədikləri kimi yönləndirir, öz iradələrini başqa ölkələrə diqtə edirlər. Dünya üçün qanunları da onlar icad diblər. Adını "beynəlxalq hüquq", "insan haqları", "demokratiya" qoyaraq xalqların başına min cür oyun açmaqdadırlar. Həmin qanunlarsa onlara aid deyil. Çünki qanunu yazanlar özlərini çoxdan nəzərə alıblar.
   
   Nə qədər Kremlin işğalı altındaydıq bizlərdə belə bir təsəvvür vardı ki, "Qırmızı imperiya"dan kənarda insanlar, ölkələr öz həyatlarını yaşayırlar. Gizli qulaq asdığımız radiostansiyalar demokratiyadan, insan hüquqlarından danışırdılar. Amerikanın geridə qalmış ölkələrə göstərdiyi humanitar yardımlardan, demokratiyanın inkişafı üçün verdiyi böyük pullardan söz açırdılar. Diktatorların ağıllandırılması hamının xoşuna gəlirdi... Amma SSRİ-nin süqutundan sonra bizə də aydın oldu ki, dünyada başqa bir Kreml də var və onun adı Ağ Evdir.
   
   Biz bunları gördük, lakin təbliğat yenə həmin təbliğatdır. Dünyanın bir nömrəli jandarması hər kəsə demokratiya, humanizm mücəssəməsi şəklində təqdim olunur. Bir BMT-də yaradıblar ki, bir çox məsələlərdə onların öz adı hallanmasın. Məlum olur ki, ölkələrin biri-birinə inteqrasiyasının, inkişafının, tərəqqisinin tərəfdarı kimi çıxış eməsi də görüntüdən başqa bir şey deyildir. Əslində dünyanın bu böyük gücləri başqa ölkələrin inkişafında, güclənməsində qəti maraqlı deyillər.
   
   Əksinə inkişafa qədəm qoyan ölkələri ən müxtəlif üsullarla sıradan çıxarmağa çalışırlar. 1980-ci illərdən başlayaraq hərbi gücünü xeyli artıran İraqı Səddam Hüseynin diktaturası, kimyəvi qırğın silahı bəhanəsi ilə yerlə-yeksan elədilər. Milyonyarla əhalisini qırdılar. İndi isə özləri orada hərbi rejim formalaşdırıblar.
   
    Bu gün isə xeyli dərəcədə güclənən İranın növbəsidir. İnanılmış müttəfiq dedikləri Türkiyəni demokratik islahatlar, qondarma "erməni soyqırımı", Avropa Birliyinə üzvlük adı altında sökməklə məşğuldurlar. Çünki onlara nə inkişaf etmiş Türkiyə, nə ğüclü İraq, nə də nüvə silahına malik İran sərf edir.
   
   Azərbaycanın inkişaf potensialı da onları narahat edir. Bu ölkə kiçik dövlət olsa da onlar istəmirlər ki, burada həyat səviyyəsi yüksəlsin. Onlar zəiflərin, kasıbların, ehtiyac içərisində boğulanların "möhtac yeri" olmağı qarşılarına məqsəd qoyublar. Ölkələrdəki iqtisadi krizisləri, kölgə iqtisadiyyatını, rüşvəti... pisləsələr də dolayısı ilə bunlar üçün şərait yaradırlar. Çünki həmin neqativ proseslər "çiçəkləndikcə" ölkələr çökür, çökdükcə də "böyüklərə" möhtaclığı artır.
   
   Bu günləhdə Dağlıq Qarabağdakı separatçı rejimə külli miqdarda maliyyə vəsaiti ayırmaqla əslində münaqişənin daha da uzanmasına şərait yaradırlar. Dövlət Departamentinin həmin yardımı ayırmasından sonra məhz separatçı rejimin başında duranlar hamıya bildirirdilər ki, Amerika bizi dəstəkləyir, yardımlar ayırır, gələcəkdə də tanıyacaq.
   
   Hazırladıqları cürbəcür hesabatlarda kefləri istədikləri ölkələrin adlarını ora yazmaqla onları təzyiq altinda saxlayırlar. Guya hansı ölkələrdəsə insanların hüquqlarının pozulmasından narahatdırlar, guya demokratiya pozulan ölkələrdə əhali çox əziyyət çəkir və buna dözə bilmirlər. Amma söhbət konkret məsələyə - Azərbaycanın torpaqları işğal edildiyi üçün evlərində yaşamaq hüququ belə əlindən alınmış bir milyon vətəndaşımıza gələndə "erməni millətinin özünü təyinetmə haqları" yada düşür...
   
   Bu gün bütün ölkələr baş jandarma ilə münasibətlərini onun üzə çıxarmadığı iddialarını nəzərə almaqla tənzimləməli, qurmalıdır. Yoxsa var olduğu müddətdə ona möhtac qalacaq.
   
   

Sabah Tələbə Qəbulu üzrə Dövlət Komissiyası Bakıda 2009-10-cu tədris ili üçün ali məktəblərə qəbul imtahanlarının elmi-statistik təhlilinə həsr olunmuş zona müşavirəsi keçirəcək.
   
   TQDK-dan verilən məlumata görə tədbirdə qurumun sədri Məleykə Abbaszadə 2009-10-cu tədris ili üçün keçirilmiş qəbul imtahanlarının elmi-statistik təhlilinə dair ətraflı məruzə ilə çıxış edəcək.
   
   Zona müşavirəsində Təhsil Nazirliyinin, Bakı şəhəri üzrə Təhsil İdarəsinin rəhbərliyi, eləcə də Binəqədi, Əzizbəyov, Nərimanov, Nəsimi, Nizami, Qaradağ, Sabunçu, Səbail, Suraxanı, Xətai, Yasamal, Şuşa, Zəngilan, Xocalı və Xocavənd rayonlarının qabaqcıl məktəblərinin direktorları və müəllimlərinin iştirakı nəzərdə tutulur.
   
   Müşavirələrdə adı çəkilən rayonların orta məktəb məzunlarının qəbul imtahanlarında göstərdikləri nəticələr geniş müzakirə olunacaq.
   
   TQDK mətbuat xidmətindən "Ədalətə" verilən məlumata görə, 2009-10-cu tədris ili üçün tələbə qəbulunun nəticələrinin elmi-statistik təhlili nəticəsində əldə olunmuş zəngin elmi materiallar "Abituriyent" jurnalının 12-ci sayında dərc edilib və həmin nəşrin elektron variantı internet səhifəsində yerləşdirilib. Bununla yanaşı, respublikanın bütün şəhər və rayonları üzrə 2009-cu il məzunlarının qəbul imtahanlarındakı nəticələrinə dair xüsusi statistik məlumat kitabçaları hazırlanıb. Hazırlanmış məlumat kitabçasında müvafiq bölgənin məzunlarının imtahan fənləri üzrə göstəriciləri, topladıqları ballar haqqında məlumatlar, ayrı-ayrı təhsil ocaqlarına qəbul olunanların sayı, bölgənin hər bir məktəbini təmsil edən orta statistik abituriyentin nəticələri və qəbulolma göstəriciləri öz əksini tapıb. Həmin məlumat kitabçaları ölkənin təhsil şöbələrinə və orta məktəblərinə paylanılıb.
   
   Verilən məlumata əsasən təqdim olunan materialların pedaqoji ictimaiyyət tərəfindən hərtərəfli təhlili təhsil problemləri ilə məşğul olan elm ocaqlarına, müxtəlif pillədən olan təhsil müəssisələrinə, elmi-metodik mərkəzlərə, dövlət qurumları və ictimai təşkilatlara mövcud çatışmazlıqları aradan qaldırmaq, fəaliyyətlərini daha da təkmilləşdirmək istiqamətində zəngin məlumatlar verə bilər. Bu materiallardan metodiki cəhətdən düzgün istifadənin tədris prosesinin səviyyəsinin yüksəlməsində də əhəmiyyətli rol oynaya biləcəyi bildiriliır.
   
   
   
   

Aydın Mirzəzadə: "Bu hadisədə bizim hərbi xidmətdən sonra qulluğunu davam etdirən 4 nəfər zabitimiz həyatını itirib. Onların arasında ən yaşlısı, yenicə polkovnik-leytenant rütbəsi almış hərbçinin cəmi 35 yaşı var. Dünyasını dəyişən hərbçilərimizin hər birinin ailəsi başsız, övladları yetim qaldı. Bu kifayət qədər ciddi məsələdir. Bu gün hansısa tərəfi ittiham etmək və yaxud da kiminsə irəli sürdüyü versiyanın qabardılmasını düzgün saymıram".
   
   
   
   
   
   Yaşar Cəfərli: "Təkcə keçən il 73 nəfər hərbi qulluqçumuzu itirmişik. Onların sırasında xeyli sayda nizamnamədən kənar münasibətlər, "dedovşina" nəticəsində baş vermiş ölüm hallarına rast gəlinir. Bundan əvvəlki illlərdə də hər il üçün 60-dan çox hərbçimizi itirmişik. Ümumiyyətlə, atəşkəsdən sonra Azərbaycan 3500-dən çox hərçisini itirib ki, onun da 10-15 faizi Ermənistanın atəşkəsi pozması və yaxud da mina partlayışı nəticəsində baş verib. Yerdə qalanları isə nizamnamədən kənar münasibətlərin nəticəsi kimi ortaya çıxır".
   
   
   
   Ötən həftə Daşkəsən rayonunda yerləşən "N" saylı hərbi hissədə 6 nəfər hərbçinin ölümü ilə nəticələnən hadisə baş verdi. Hadisənin təfərrüatları tam açıqlanmasa da müxtəlif versiyalar irəli sürülür. Əksəriyyətin qənaəti ondan ibarətdir ki, burada xarici faktorların izi daha çox hiss olunur. Rəyini öyrəndiyimiz müsahiblərin də məsələyə münasibəti birmənalı deyil.
   
   Millət vəkili Aydın Mirzəzadə deyir ki, bütün ordularda ara-sıra silahla bağlı insident olur: "Təəssüflər olsun ki, bu bütün ordulara xas olan bir xüsusiyyətdir. Məqsəd belə halları minimuma endirmək, ən yaxşısı isə belə halların baş verməsinə şəraitin yaradılmamasıdır. Mən deyərdim ki, Azərbaycan ordusu hadisələrin baş vermə intensivliyinə görə dünya ordusu arasında az hadisə baş verən qrupda yer alır. Doğrudur, bu amil heç də baş vermiş hadisələrə haqq qazandırmır. Hər bir hadisə cəmiyyətin diqqətində olmalı, müvafiq orqanlar tərəfindən ciddi şəkildə araşdırılmalıdır. Daşkəsəndə yerləşən hərbi hissədə baş vermiş olay olduqca faciəvi bir məsələdir. Bu hərtərəfli araşdırılmalı və hərtərəfli də hadisəyə münasibət bildirilməlidir. Artıq ilk reaksiya var və həmin andan Daşkəsən "N" saylı hərbi hissəsinə Hərbi Prokurorluğun müstəntiqləri göndərilib".
   
   Hazırda Hərbi Prokurorluq nümayəndələrinin hadisə baş vermiş ərazidə araşdırma apardığını vurğulayan A. Mirzəzadə deyir ki, nəticə bəlli olmadan əvvəlcədən hansısa fikri səsləndirmək yerinə düşməz: "Çünki müxtəlif versiyalar irəli sürülə bilər, amma ortada təsdiqlənmiş və şahid ifadələri ilə təsdiqini tapan variant düzgün ola bilər. Ona görə də tələsməmək, araşdırmanın nəticəsini gözləmək məsləhətdir".
   
   Ərazisi işğal altında olan və hər an müharibənin baş verməsi gözlənilən ölkə üçün bu kimi halların əhalidə psixoloji gərginlik yaratmasına gəlincə, millət vəkili də onu istisna etmir: "Əlbəttə ki, baş vermiş olay sadə bir hadisə deyil. Bu hadisədə bizim hərbi xidmətdən sonra qulluğunu davam etdirən 4 nəfər zabitimiz həyatını itirib. Onların arasında ən yaşlısı, yenicə polkovnik-leytenant rütbəsi almış hərbçinin cəmi 35 yaşı var. Dünyasını dəyişən hərbçilərimizin hər birinin ailəsi başsız, övladları yetim qaldı. Bu kifayət qədər ciddi məsələdir. Bu gün hansısa tərəfi ittiham etmək və yaxud da kiminsə irəli sürdüyü versiyanın qabardılmasını düzgün saymıram".
   
   Hərbi ekspert Yaşar Cəfərlinin sözlərinə görə, istənilən hərbi hissədə zaman-zaman rast gəlinən bu kimi hallar təkcə ordunun problemi deyil: "Bu bütövlükdə cəmiyyətin problemidir. Təkcə hadisənin baş vermə prosesini izləyəndə bir daha buna əminlik yaranır. Bu hərbi cinayətdir, çox böyük ehtimalla nizamnamədən kənar münasibətlərin nəticəsidir. Hadisənin nədən baş verməsi ilə bağlı hələlik tam təfərrüatı ilə rəsmi məlumatlar verilmir. Baş vermiş hadisənin iştirakçısı olan əsgərlərin hər biri bir evdə, tərbiyyə, təhsil müəssisələrində, ali məktəblərdə tərbiyə alıblar. Tutaq ki, onları lap təhqir ediblər. Axı, hüquqlarının bərpası üçün qayda-qanun, şikayət etmək hüquqları və buna imkanları var. Eyni zamanda yüksək komandanlıq, Qeyri Hökumət Təşkilatları, KİV-lər, digər ictimaiyyət nümayəndələri və yetərincə sadalanması mümkün olan qurumlar mövcuddur ki, əsgərlər onlara müraciət edə bilərdilər. Amma bunun əvəzində əsgərlər banditə xas hərəkətlərə əl atırlar. Təbii ki, bu ciddi sosial problemdir. Bunun üzərində düşünülməlidir".
   
   Maraqlıdır, əsgər niyə qarşılaşdığı qanunsuzluqla bağlı mövcud instansiyalara üz tutmur? Bunun səbəbini hərbi hissələrdə əsgərlərin marifləndirilməməsində görən ekspert deyir ki, əsgərə hüququ və hüquq pozuntusuna məruz qaldığı halda hara müraciət etməli olduğu izah olunmur: "Əsgərin marifləndirilməsi prosesini həm ordunun müvafiq strukturları, həm də orta və təhsil aldıqları digər məktəblər icra etməlidir. Həmçinin də hərbi hazırlıq dərsləri zamanı əsgərə nə edə biləcəyi başa salınmalıdır. Baş vermiş hadisənin digər versiyalarla əlaqələndirilməsinə inanmıram. Bunu Rusiya, Ermənistan, nazir Səfər Əbiyevin rəqiblərinin planlaşdırdığı inandırıcı görünmür. Bu ilk hadisə deyil və ordudakı sosial problemlər aradan qaldırılmasa, belə halların təkrar baş verməsi inkar oluna bilməz. Hər bir ailədə söz-söhbət olur və heç kimi o dəqiqə kimisə öldürməyə can atmır. Hərbi hissə, kollektiv də bir ailədir. Təbii ki, ordada söz-söhbət olur, amma insanlar gətirib bir-birini öldürəcək səviyyəyə çatdırmamalıdır. Təkcə keçən il 73 nəfər hərbi qulluqçumuzu itirmişik. Onların sırasında xeyli sayda nizamnamədən kənar münasibətlər, "dedovşina" nəticəsində baş vermiş ölüm hallarına rast gəlinir. Bundan əvvəlki illlərdə də hər il üçün 60-dan çox hərbçimizi itirmişik. Ümumiyyətlə, atəşkəsdən sonra Azərbaycan 3500-dən çox hərçisini itirib ki, onun da 10-15 faizi Ermənistanın atəşkəsi pozması və yaxud da mina partlayışı nəticəsində baş verib. Yerdə qalanları isə nizamnamədən kənar münasibətlərin nəticəsi kimi ortaya çıxır".
   
   

İslam Konfransı Təşkilatının Parlament Birliyi "Xocalıya Ədalət" beynəlxalq kompaniyasına dəstək çərçivəsində xüsusi qətnamə qəbul edib. İKT Gənclər Forumunun İstanbulda yerləşən baş qərargahından verilən məlumata əsasən, Uqandanın paytaxtı Kampala şəhərində keçirilən 6-cı sessiyaya 51 dövlətin parlament rəhbərləri və nümayəndə heyətləri qatılıb. Konfransda qurumun Gənclər Forumunun təşəbbüsü ilə "İKGF ilə İKT PB arasında əməkdaşlıq" haqqında qətnamə qəbul olunub. İKGF-nin mədəniyyətlərarası dialoq üzrə baş koordinatoru Leyla Əliyevanın təşəbbüsü ilə həyata keçirilən "Xocalıya Ədalət" beynəlxalq kompaniyası çərçivəsində irəli sürülən qətnamədə Xocalı faciəsinə "Erməni silahlı qüvvələri tərəfindən dinc əhalinin kütləvi qətliamı" və "insanlığa qarşı cinayət" kimi qiymət verilib. Qətnamədə "Xocalıya Ədalət" kompaniyasına tam dəstək ifadə olunub, quruma üzv olan 51 dövlətin parlamenti bu faciəni insanlığa qarşı cinayət kimi tanımağa və kompaniyaya həm milli, həm də beynəlxalq səviyyələrdə dəstək verməyə çağırılıb.
   
   Sənədi şərh edən İKGF baş katibi, səfir Elşad İsgəndərov bildirib ki, qətnamə beynəlxalq təşkilatlar tərəfindən Xocalı faciəsini insanlığa qarşı cinayət kimi tanıyan ilk sənəddir: "Nəzərə alsaq ki, İKT PB öz sıralarında dünya parlamentlərinin dörddə birini cəmləşdirir və dünyanın ən böyük parlamentlərarası beynəlxalq qurumlarındandır, sözügedən termin Xocalı faciəsinin erməni millətçiləri tərəfindən Azərbaycan xalqına qarşı aparılan soyqırım siyasətinin tərkib hissəsi kimi beynəlxalq səviyyədə tanınması və bu cinayəti törədənlərin hüquqi məsuliyyətə cəlb edilməsi üçün keyfiyyətcə yeni mərhələ açacaq".
   
   Qeyd edək ki, qətnamənin qəbul olunması ilə bağlı ideya İKGF baş koordinatoru Leyla Əliyeva tərəfindən ötən il Bakıda kampaniyanın milli koordinatorlarının görüşü zamanı irəli sürülüb. "Xocalıya Ədalət" kompaniyasına 2009-cu ilin fevralında start verilib və hazırda 30 dan artıq ölkədə yüzlərlə könüllünun iştirakı ilə uğurla davam etdirilməkdədir. Kompaniyanın beynəlxalq əlaqələndirilməsi www.justiceforkhojaly.org saytı vasitəsilə aparılır.
   
   

İngiltərənin Avropa İslahat İnstitutu, Nabucco təbii qaz boru kəməri layihəsinin Türkiyənin Ermənistan siyasəti səbəbiylə ləngidiyini bildirib. İnstitutun Nabucco layihəsi ilə bağlı yayımladığı hesabatda, Azərbaycanın qaz hasil edən ən önəmli ölkələrdən biri olduğu vurğulanıb. Hesabatda, Nabucco layihəsi üçün nə qədər təbii qazın hansı qiymət və şərtlərdə nəql olunması mövzusunda Türkiyə ilə Azərbaycan arasında fikir ayrılığı olduğu bildirilib.
   
   "Ermənistan ilə münasibətlərini istiləşdirməyə başlamış Türkiyənin Azərbaycan ilə münasibətlərin gərginləşib, bu da Nabucco layihəsinin ləngiməsinə əsas rol oynayıb. Öncə Nabucco üçün nəzərdə tutulan 8 milyard kubmetr təbii qazın "Şahdəniz" yatağından çıxarılması planlaşdırıldığı halda hazırda bölgədəki neft şirkətləri burada kəşfiyyat işlərini dayandırıb", - deyə hesabatda vurğulanır.
   
   Nabucco layihəsi ilə bağlı durumun çox da yaxşı olmadığı qeyd olunan hesabatda sonda Türkiyə ilə Azərbaycanın razılığa gələcəkləri bildirilir. "Bakı Avropanın təbii qaz bazarına çıxmağı çox istəyir. Türkiyənin enerji bazası olmaq istəyi də güclüdür. Hər 2 ölkə təbii qazın axmağa başlamasından sonra bir çox neft nəhənglərinin gözünü bu bölgəyə çevirəcəyini yaxşı bilirlər", - deyə hesabat müəllifləri vurğulayıblar.
   
   

Kərbəla şəhəri yaxınlığında silahlı hücum zamanı yaralanan azərbaycanlı zəvvarlar müalicə kursunu başa vuraraq mehmanxanaya yerləşdiriliblər. Bu barədə APA-ya Azərbaycanın İordaniya və İraqda fövqəladə və səlahiyyətli səfiri Elman Araslı məlumat verib.
   
   Onun sözlərinə görə, səfirlik hadisə ilə bağlı dərhal İraq Daxili İşlər Nazirliyi ilə əlaqə saxlayıb və nazirlik azərbaycanlı zəvvarları aparan avtobusun Kərbəladan Samirə şəhərinə gedən yolda atəşə məruz qalması faktını təsdiqləyib. Xatırladaq ki, silahlı hücum zamanı Azərbaycan vətəndaşı, 1994-cü il təvəllüdlü Leyla Əhmədova həlak olub, digər soydaşlarımız Müşfiq Abdullayev (1986) və Nüşabə Nəzərova (1975) yaralanıb. Səfir yaralıların aldığı xəsarətin ciddi olmadığını, onlara ilkin tibbi yardım göstərildiyini bildirib. Səfir terror aktı zamanı dünyasını dəyişən Leyla Əhmədovanın Nəcəf şəhərində dəfn olunduğunu bildirib.
   
   

Adətən valideynlır uşaqlarının kiçik, məktəbəqədər yaşlarında onun hansı əlinin aparıcı olduğunu demək olar ki, diqqət yetirmirlər. Uşağın 4-5 yaşı olanda, o rəsm çəkəndə, yazanda əllərindən birinin daha aktiv olduğu nəzərə çarpır. Nəsillərində solaxay olanlar ailədə solaxay uşaqları tez bilirlər və ən çox da onlar belə uşağı məktəbə qədər yenidən öyrətmək istəyirlər. Özü də valideynlər bununla uşağa yaxşılıq etmək, onu nə vaxtsa özlərinin qarşılaşdıqları çətinliklərdən qorumaq istəyirlər.
   
   Bəzən elə olur ki, uşağın solaxaylığından nə valideynlər, nə də müəllim xəbər tutur. Onlar uzun müddət başa düşə bilmirlər ki, uşaq niyə pis xətlə, gözəl və səhvsiz yaza bilmir. Bunu ancaq mütəxəssislərlə məsləhətləşdikdən sonra anlayırlar.
   
   Sizi xəbərdar etmək istyirik ki, solaxaylığı tərgitməyə çalışmaq valideynlər və müəllim tərəfindən uşağın sağlamlığına böyük risq yaratmaqdır. Mütəxəssislər bu rəydədilər ki, solaxaylığı tərgitməyə çalışmaq uşaqlarda müxtəlif nevrozların yaranmasına səbəb olur. Onların xüsusiyyətləri haqda danışmaq istəyirik.
   
   1. Astenik nevroz.
   
   Tez yorulub əldən düşmək, əsəb sisteminin sıradan çıxması, iş qabiliyyətinin həddən artıq azalması. Faktiki olaraq uşaqlar ancaq ilk iki dərsdə fəal işləyə bilirlər, sonra isə onların diqqətini cəmləmək çox çətin olur: amma onlarda hərəkət ləngliyi ya yaranır, ya da artır. Dərslərin hazırlanması uzanır , nəticələr isə çox vaxt qeyri-məqbul olur. Yazılı işlərdə daha çox çətinliklər yaranır: xətt sabit olmur, hərflər müxtəlif ölçüdə yazılır, hərəsi bir tərəfə meyllənir, sətirdən çıxır, çoxlu ştrixlər və düzəlişlər edilir. Təkrar köçürmələr isə nəticələri daha da pisləşdirir. Buna xüsüsi diqqət yetirmək lazımdır.
   
   Oğlanlarda və qızlarda bu nevroz müxtəlif cür təzahür edir. Oğlanlar üçün özünü saxlaya bilməmək, bir yerdə otura bilməmək və hərəkət narahatlığı xarakterikdirsə, qızlarda əhval-ruhiyyənin aşağılığı, üzgünlük və ağlamaq üzə çıxır.
   
   2. Məktəb qorxuları.
   
   Solaxay uşaqlar çox vaxt yazı işlərində uğursuzluqdan qorxurlar. Uşaqlar bu qorxunu adi sayırlar və onu dəf etmyə çalışmırlar. Mətəxəssislər solaxaylığı tərgitməklə hətta gecələr keçirilən dəhşətlərdən narahatdırlar: Uşaqlar gündüz keçirdikləri həyəcanları daha da böyüdülmüş şəkildə gecələr yuxuda da görürlər: dəftərlər onları boğur... Səhərlər onlar yorğun və şıltaq oyanırlar...
   
   3.Əl çəkməyən vəziyyət nevrozu.
   
   Əgər valideynlər uşaqlarına hər işi sağ əllə görməyə məcbur edərlərsə, uşaqlar qulaq asacaq və çalışacaqlar, amma adətən bu onlarda çox pis alınır. Valideynlər isə bunu tərslik, kapriz sayır və uşaqlarını cəzalandırırlar. Əgər müəllim uşaqdan sağ əllə yazmağı tələb edir və yazının keyfiyyətinə, ləng yazılmasına görə qiyməti aşağı salırsa, uşaqda həyəcanlı uğursuzluq gözləmə və özünün normal olmadığı haqda əl çəkməyən fikirlər yaranır.
   
   Solaxaylığı zorla tərgitmək haqda olan elmi yazıda bu kimi halların nevrotik enurez (sidik saxlamama), kəkələmə, titrəmə və gözqırpmalar... xəstəliklərinə gətirib çıxarması da göstərilir. Qusma, epilepsiya, nevrostenik korluq və daha dəhşətli halların baş verməsinin bir səbəbi də solaxaylığın zorla tərgidilməsidi...
   
   
   
   
   
   
   
   P.S. Kompüterimdə müəyyən problemlər yarandığından ehtiyatda olan tərcümələrdən birini təqdim etməli oldum. Amma düşünürəm ki, kiməsə nəinki maraqlı, həm də əhəfmiyyətli ola bilər.

Azərbaycan müstəqillik əldə etdikdən sonra ölkə həyatının müxtəlif istiqamətlərində böyük uğurlara imza atıb. Hətta iqtisadiyyatda, özünün nailiyyətləri ilə təkcə MDB məkanında deyil, eləcə də dünyada diqqətiçəkən yerlərdən birinə sahib olubdu. Bütün bunlar da aparılan uğurla siyasətin bəhrəsidi. Sevinc doğuran iqtisadi-siyasi uğurlar nə qədər ürək açsa da, lakin milli, mənəvi dəyərlərə vurulan zərbələr öz-özlüyündə bir narahatçılığa səbəb olur. Bu da hər birimizin gözü qarşısında baş verir. Təəssüf ki, ictimaiyyətin, mətbuatın görüb izlədiyi, bəzən barəsində kəskin fikirlər söylədiyi olaylar şeç də aradan qaldırılmır, əksinə...
   
   Respublika Prezedintinin İcra Aparatının rəhbəri, akademik Ramiz Mehdiyev cənablarının da barəsində kəskin danışdığı telekanalların bir çox verilişləri doğrudan-doğruya milli-mənəvi dəyərləri baltalamağa yönəlibdi. Təəssüf doğuran budur ki, özünü müstəqil hesab edən telekanallar icazəsiz daxil olduqları tamaşaçı evlərində müxtəlif təsir gücünə malik olurlar. Bir-birindən mənasız və yalnız saxta gülüş doğuran seriallar, eləcə də adı əyləncəli olub, özü ikrah hissi yaradan şoular az qala teleməkanın çox böyük hissəsini öz cənginə alıbdı. Sanki bu düşünülmüş və qərəzli bir ssenaridi. Məqsəd də Azərbaycan tamaşaçısını, Azərbaycan insanını düşünməkdən, sabahının layihələrini cızmaqdan uzaq salmaqdı. Necə deyərlər, hər kəsin başını qatmaq və hər kəsin də əvəzinə qərar vermək!
   
   Doğrudan da istər paytaxtda, istərsə də bölgələrdə həmsöhbət olduğum insanların böyük əksəriyyəti SMS-lərlə guya tamaşaçı toplayan verilişlərin onları əsəbləşdirdiyini, reallığını əks etdirmədiyini dilə gətirirlər. Xususi olaraq vurğulayırlar ki, bu SMS-li verilişlər pul qazanmağa və tamaşaçının vaxtını ekran qarşısında öldürməyə xidmət edir. Özü də bütün əyləncəli verilişlərin demək olar ki, sonluğu əvvəlcədən bəlli olur. Tamaşaçı nə qədər real düşüncəyə malik olur-olsun verilişin sonluğu aparıcının, layihə müəllifinin istəyinə uyğun başa çatır. Yəni nə qədər SMS göndərirsən-göndər, sonda yenə əvvəlcədən məlum olan qalibin adı səslənəcək. Bu cür verilişlərə gen-bol yer ayıran telekanallar tariximizlə, mədəniyyətimizlə, əxlaqımızla, elmi uğurlarımızla, təsildəki, real həyatdakı problemlərimizlə bağlı işğal olunmuş torpaqlarımızın azad edilməsi ilə bağlı görüləcək işlərlə bağlı əlaqələr ya verilişlər hazırlamırlar, ya da hazırlanan verilişlərin səviyyəsi, vaxtı o qədər məhdud olur ki, bu verilişin nə üçün efirə getdiyini anlamaq mümkün olmur.
   
   Bu gün Heydər Əliyev Fondunun, eləcə də digər dövlət qurumlarının dəstəyi ilə hazırlanan layihələrdə SMS-lərin olmaması göstərir ki, şou proqramaları da, əyləncəli verilişləri də, hətta muğam yarışlarını da istənilən səviyyədə keçirmək mümkündü. Sadəcə buna həm vətəndaş marağı, həm də vətəndaş istəyi olmalıdı. Evirə veriliş hazırlayanlar isə, eləcə də o verilişlərin sifarişini verənlər milli dəyərlərə bağlı olmaqla kimliyimizi, ailələrimizi, ən vacibi isə gələcəyimiz olan gəncliyi düşünməlidir. Bilməlidir ki, bu verilişlə bizim gəncliyə nəyi diqtə edir, onları hara səmtləndirir. Əgər bu sualın cavabını telekanalların layihə müəllifləri, veriliş aparıcıları özləri üçün müəyyənləşdirsələr onda yayımlanan şou proqramların da heç olmasa 50 faizində millətə lazım olan nəyisə tapmaq olar. Təəssüf ki, bu günkü reallıq bizim tərəf və istəyimizdən hələ ki, çox uzaqdı. Zənnimcə bunun da ən başlıca səbəbi kimlərinsə dəyirmanına su tökmək, xalqı öz soy kökündən uzaqlaşdırmaq arzusudu. Amma bu cür arzular ayaq tutsa da yeriyə bilməyəcəklər. Buna nə Azərbaycan tamaşaçısı, nə də bu xalqın rəhbərləri yol verməyəcəklər.
   
   
   
   

BABƏK YUSİFOĞLU
İlk insanlar nə vaxt ki, şəxsi əmlakın nə olduğunu anladılar, o vaxtdan bəri onların arasında əbədi mübarizə başladı. Və mülkiyyət böyüdükcə insanlar arasında qarşıdurmalar da getdikcə artdı, əvvəl fərdi toqquşmalara, sonra ailə, tayfa, nəhayət dövlətlər arasında mübarizələrə, müharibələrə çevrildi. İnsanlığın bu əzəli və əbədi mübarizəsi artıq min illərdi ki, fasiləsiz olaraq davam edir, nə verilən qurbanların böyüklüyü, nə çoxluğu, nə də digər itkilər maraq sahiblərini durdura bilmir. Və məsələyə ən adi məntiqlə baxdıqda belə nəticə çıxarmaq olur ki, bu mübarizələr heç vaxt bitməyəcək. Bəlkə də bunun özü də bir tarixi zərurətdir.
   
   Bir sıra siyasi şərhçilərə görə, dövlətlərin arasında olan mübarizələrin ilhamvericiləri siyasi ideoloqlardır. Bunlar o ideoloqlardı ki, onların siyasi düşüncə tərzi hakimiyyətdə olanları inandıra, fəaliyyətlərini yönləndirə bilir. Doğrudan da araşdırmalar göstərir ki, ta qədim dövrlərdən tutmuş bu günədək dövlətlərin idarə olunmasında belə ideoloqların təsiri var, yəqin ki, bundan sonra da olacaq. Etiraf etmək lazımdır ki, əslində adı dünyanın yaddaşına yazılan belə politoloqlar o qədər də çox deyil. Və belə şəxsiyyətlərdən biri də əslən polşalı olan məşhur amerikalı dövlət və ictimai xadim, məşhur politoloq, beynəlxalq münasibətlər üzrə böyük mütəxəssis Zbiqnev BJEZİNSKİdir.
   
   
   
   Bjezinski
   
   
   
   1928-ci il martın 28-də Polşanın paytaxtı Varşavada diplomat ailəsində dünyaya göz açıb. Onun uşaqlığı öz doğma şəhərində keçsə də tezliklə ailəsi ilə birlikdə oranı tərk etməli olub. Çünki dövrünün nüfuzlu diplomatlarından sayılan Bjezinskinin atasını 1938-ci ildə Polşanın Monrealdakı konsulluğuna işə göndərirlər. Və bununla da Bjezinskilər ailəsinin Kanada həyatı başlayır. Bir qədər sonra başlayan 2-ci Dünya Müharibəsi onların vətənə dönməyinə mane olur. Beləliklə Zbiqnev Monrealda təhsilini davam etdirir. Daha sonra o, Monrealdakı Makcilla universitetinə daxil olur və 1949-cu ildə həmin təhsil ocağını bitirir. Lakin elmə olan marağı, həvəsi onu elm arxasınca getməyə sövq edir və cəmi dörd ildən sonra yazdığı dissertasiyasını müvəffəqiyyətlə müdafiə edərək məşhur Harvard Universitetində elmlər doktoru adını alır və elə orada dərs deməyə başlayır. Burada işləri yaxşı gedən gənc Zbiqnev həyatını elə Amerika ilə bağlamaq qərarına gəlir. Bunun üçün çalışan gənc politoloq nəhayət 1958-ci ildə Amerika vətəndaşlığını qazanır. Artıq o bir amerikalı sayılırdı. Bir müddət keçəndən sonra Zbiqnev ailə qurmaq qərarına gəlir və bu qərarını çox da yubatmır. Çünki ömür yolunu birgə addımlayacağı namizədi artıq tapmışdı. Bir qədər sonra həyatın onunla rastlaşdırdığı Çexoslavakiyanın keçmiş prezidentinin qohumu Emili Beneşlə ailə qurur və onların üç övladı dünyaya gəlir.
   
   Öz savadı və bacarığı ilə seçilən Zbiqnev Bjezinski həm bir mütəxəssis, həm də praqmatik politoloq kimi tanınmağa başlamışdı. Tez-tez müxtəlif tədbirlərdə görünən gənc mütəxəssis və elm adamı rəsmi dairələrin də diqqətini cəlb etməkdəydi.
   
   Artıq onun
   
   mühakimələri ciddi
   
   müzakirələrə
   
   səbəb olurdu
   
   
   
   1960-cı ilin əvvəllərində Bjezinski həm iqtisadi, həm də beynəlxalq siyasi məsələlər üzrə ekspert kimi ABŞ-ı dünya arenasında aktiv rol oynamağa çağırdı. O, təkid edirdi ki, Amerika dünyanın inkişaf etmiş kapitalist ölkələri ilə siyasi həmrəylik yaratsın. O zaman çoxları onun irəli sürdüyü konsepsiyaların doğru olduğunun fərqinə vardı. 1962-ci ildə isə Bjezinski Nyu-Yorkda Kolumbiya Universitetinin professoru vəzifəsini tutdu.
   
   Qeyd edək ki, o hələ 1950-ci illərdə ciddi siyasi fəaliyyətə başlamışdı. Və demokratlar partiyasına qatılmışdı. Bu üzdən də Bjezinski C. Kennedinin və L. Consonun seçki kampaniyalarında aktiv şəkildə iştirak edir, hətta yeni prezidentin beynəlxalq məsələlər üzrə komandasında müşaviri postuna yiyələnir. Güclü mühakimə və analitik təhlil qabiliyyətinə malik Bjezinski 1966-1968-ci illərdə artıq ABŞ Dövlət Departamentinin siyasi planlaşma şurasının üzvülüyünə seçilir və burada SSRİ-yə qarşı aparılan "soyuq müharibə" strategiyası üzrə fəaliyyətlə məşğul olur. O zaman sosialist düşərgəsində Bjezinskini "təhlükəli" ideoloq kimi qəbul edirdilər. Və həmin dövrdə həqiqətən də hər iki rejimdə qarşıdurma çox yüksək həddə idi. Artıq ciddi politoloq və elm adamı kimi tanınan Bjezinski yuxarı dairələrdə də populyarlaşmışdı. Zbiqnev 1968-ci ildə ABŞ-da keçirilən prezident seçkilərində demokratların prezident kürsüsünə namizədi X. Hamfrinin seçki kampaniyası üzrə qərargahının rəhbərlərindən biri olur. Amma onların partiyası o zaman R. Niksona qalib gələ bilmir.
   
   
   
   1970-ci ildə
   
   
   
   onun "İki epoxa arasında: Amerika texniki erada" kitabı çap olunur. Bu kitabda onun irəli sürdüyü ideyalar o dövrdə Amerikanın həm iqtisadi, həm də siyasi həyatında mühim rol oynayan C. Rokfellerin çox xoşuna gəlmişdi. Hətta həmin məsələlərin həyatda gerçəkləşməsi üçün maliyyə vəsaiti də ayırmışdı. 1976-cı ildə ABŞ prezidenti seçilən C. Karterin dövründə Bjezinski milli təhlükəsizlik məsələləri üzrə köməkçi postuna (1977-1981) təyin edilir. Və bu vəzifədə çalışdığı dövrdə o özünün antikommunist fəaliyyətini daha qabarıq şəkildə ortaya qoyur, insan haqlarının pozulması üzündən SSRİ-ni çox sərt şəkildə tənqid edir. Siyasi şərhçilər 1978-ci ildə məşhur Kemp-Devid razılaşmasının imzalanmasında Zbiqnev Bjezinskinin xidmətlərinin böyük olduğunu yazırdılar. Amma bu uğurlar heç də hamının ürəyincə deyildi.
   
   
   
   Artıq yüksək dairələrdə onun əleyhdarları
   
   yaranmışdı
   
   
   
   Hətta onların öz cəbhəsində belə Zbiqnevi istəməyənlər vardı. Onun siyasi mühakimələri tez-tez Karterin dövlət katibi olan S. Vensin əks reaksiyası ilə qarşılaşırdı. İş o yerə qədər gəlir ki, prezident öz administrasiyasında yaranan bu qarşıdurmanı aradan qaldırmaq üçün hərəkətə keçir.
   
   Amma Bjezinskini bəyənməyənlər heç də Venslə məhdudlaşmırdı. Onun həm də adları bilinməyən əleyhdarları mövcud idi. Bjezinski isə heç nəyə məhəl qoymadan öz işini bildiyi kimi davam etdirirdi. Lakin çox çəkmir ki, o, özündən asılı olmayan səbəblər üzündən tutduğu vəzifədən getməli olur və yenidən elm aləminə qayıdır. Belə ki, hakimiyyət dəyişikliyindən sonra prezident postuna respublikaçı Ronald Reyqan gəlir və təbii ki, Zbiqnev gedir. Bundan sonra Bjezinski müəyyən fasilələrlə 1960-cı ildən dərs verdiyi Kolumbiya universitetindəki professor vəzifəsinə yenidən qayıdır. Və burada öz elmi fəaliyyətini davam etdirir, müxtəlif tədbirlərə qatılır. Həmin dövrün ciddi siyasi polemikalarında, müzakirələrində Bjeziniskinin görünməsi bir növ ənənəvi şəkil almışdı. O, ABŞ siyasətinə elmlik gətirən siyasi nəzəriyyəçilər içərisində ciddi fiqurlardan biri sayılırdı, onunla hesablaşırdılar.
   
   O elmi fəaliyyəti dövründə bir sıra sanballı kitablar yazır. Onlardan "Böyük iflas", "Hakimiyyət və prinsip", "Böyük şahmat taxtası", "Seçim: qlobal hakimiyyət, yaxud qlobal liderlik" və bu kimi əsərləri indi də öz əhəmiyyətini qoruyub saxlayır. Onun yazdıqlarının bir çoxu Sovet İttifaqının və postsovet Rusiyanın yaratdığı problemlərə həsr olunub. Rusiyanın siyasətini həmişə tənqid edən Bjezinski 1991-ci ildə SSRİ-nin süqutundan sonra bu ölkəni "Avrasiyanın düz mərkəzində yerləşən qara dəlik" adlandırıb. Zbiqnevə görə müasir dünya bundan tez və bacardıqca "ağrısız" qurtulmalıdır. Elə biz də uzun müddət qabaq irəli sürülmüş bu tezislərin bu gün üçün nə qədər aktual olduğunun şahidiyik. Heç kim üçün sirr deyil ki, Rusiya da SSRİ kimi imperiya siyasətini davam etdirmək üçün bütün vasitələrdən istifadə etməkdədir.
   
   Zbiqnev Bjezinski yaşının çox olmasına baxmayaraq həmişə olduğu kimi bu gün də amerikalı demokratların xarici siyasətinin beyni hesab edilir. Onu da qeyd edək ki, Bjezinski 2000-ci ildən Vaşinqton Beynəlxalq Strateji Təhqiqatlar Mərkəzinin qlobal təhlükəsizlik və geostrateji kafedrasına rəhbərlik edir. O, postsovet respublikalarında Rusiyanın təzyiqlərini azaltmaq, Azərbaycanın, Ukraynanın, Gürcüstanın və başqa respublikaların Qərbə inteqrasiyasının tənzimlənməsi, genişlənməsi üçün ciddi çəkildə çalışır. Çeçenistanda vəziyyətin normallaşması, çeçenlərin azadlıq əldə etməsindən ötrü aktiv fəaliyyət göstərir. O belə hesab edir ki, yuxarıda adı çəkilən ölkələrə daha çox siyasi və iqtisadi dəstək göstərilməli, onların NATO sıralarına qəbuluna yardım edilməlidir. Bütün dünyada olduğu kimi Zbiqnev Bjezinskinin adı Azərbaycanda da çox tanınır. Onun siyasi təhlilləri, fikirləri ölkə mətbuatda vaxtaşırı yer alır.
   
   Zbiqnevin Varşavadan başlayan həyat yolu onu əvvəlcə Kanadaya apardı, sonra bu yol Vaşinqtona uzandı. Öz biliyi, bacarığı sayəsində dünyanın bu gün barmaqla sayıla biləcək nəhəng siyasi elm adamına, nüfuzlu politoloquna çevrildi.
   
   
   
   

Oğlum Naxçıvanda hərbi xidmətdə olduğundan oraya aid hər şeyi oxuyuram: hava haqqında məlumatdan tutmuş mədəniyyət xəbərlərinəcən hamısını. Dünən bir qəribə xəbər oxudum, bilmədim güləm, yoxsa...
   
   Deyir bu gün (dünən-red) Şərurda, şəhər məscidində iki din xadiminin ölümü ilə nəticələnən qətl hadisəsi baş verib. Yox, din xadimləri müqəddəsliklərindən məsciddə ölməyiblər, bıçaqdanıblar. Bıçaqlayan da elə molla olub.
   
   Xəbərdə deyilir ki, məsciddə keçirilən yığıncaqda Qarxun kənd məscidinin mollası Qasım Məmiyevə mollalıq vəsiqəsi vermirlər. Şərurun axundu Hacı Əkbər məlumatda bildirilməyən səbəbdən Məmiyevə vəsiqə vermir. Belə çıxır ki, Siyaqut kəndinin mollası Qəzənfər Quliyev də axundun tərəfini saxlayır. Belə olanda molla Qasım cibindən qəməltini çıxarıb, qədeşlər demiş, itələyir axunda və molla həmkarına.
   
   Yaralıları xəstəxanaya çatdırsalar da, onların həyatını xilas etmək mümkün olmur. Deyəsən molla Qasım Məmiyevə indi başqa "knijka" verəcəklər. Amma indi yox, bir reçə ildən sonra. Hələlik polis məsələni araşdırır. İş də qaldırılıb, istintaq gedir. Molla Qasım daha evində yatmır, hökumət yer də verib, yemək də...
   
   

Türkiyədə yaşayan azərbaycanlıların "Can Azərbaycan Televiziyası" adlı telekanalı fəaliyyətə başladı. Telekanalın fəaliyyətini www.canaz.tv internet saytından izləmək mümkün olacaq. Telekanalın verilişləri əvvəlcə yalnız internet, bu ilin sonunadək isə peyk (Türksat) vasitəsilə yayımlanacaq. Türkiyədə yaşayan azərbaycanlıların yaratdığı telekanal dünyada yaşayan azərbaycanlıların televiziyası olacaq.
   
   "CanAz" TV əsasən mədəni-mənəvi dəyərlərə üstünlük verəcək və milli mədəniyyətimizin yaşaması, yayılması, tanınması və inkişaf etdirilməsini qarşısına məqsəd qoyub.
   
   

Qəssab ginekoloq köməkçisi işinə düzəlir. Birinci doğuşu qəbul edirlər. Hər şey normal keçir. Ginekoloq uşağı tutur, köməkçisinə verir:
   
   -Apar uşağı çək!
   
   Beş dəqiqədən sonra qəssab qayıdır. Həkim soruşur:
   
   - Neçə?
   
   -Üç kilo iki yüz... sümüksüz...

Mən Hacıyev Akif Mirzə oğlu Bakı şəhəri, Qaradağ rayonu ərazisində iş adamı kimi fəaliyyət göstərirəm. Vergi ödəyicisiyəm. 2004-cü ildən Qaradağ rayonunun Ümid qəsəbəsində ərzaq mağazası açaraq sahibkarlıqla məşğul oluram. 2008-ci il 20 oktyabr tarixində Yeni Massiv ev 52-də yaşayan Qasımova Əsmət Faiq qızı ilə 006 saylı əmək müqaviləsi bağlayaraq onu mağazaya satıcı vəzifəsinə işə qəbul etmişəm. Həmin vaxtdan 2009-cu il 6 yanvar tarixinədək Əsmət Qasımova mağazadan mənə məxsus 2825.99 manat pulu mənimsədiyi üçün Qaradağ rayon məhkəməsində onun barəsində qaldırılmış AR CM-nin 179.2.3 və 179.2.4-cü maddələri ilə günahkar bilinərək onun barəsində mənə dəymiş ziyanın ödənilməsi və 3 min manat cərimə ödəməsi barədə hökm çıxarılmışdı. Apellyasiya Məhkəməsi Qaradağ Rayon Məhkəməsinin qərarını qüvvədə saxlayaraq mənim şikayətimi rədd edib.
   
   Sonradan satıcı vəzifəsinə işə götürdüyüm Nəcəfova Səbinə Şakir qızı da işlədiyi dövrdə mağazada 4301 manat mənimsəyərək mənə maddi ziyan vurub. Onun barəsində də AR CM-nin eyni maddələri ilə cinayət işinə baxan Qaradağ Rayon Məhkəməsi dövlət iddihamçısının onun barəsində 3 il həbs cəzası istəməsinə baxmayaraq, cəmisi 100 manat cərimə edilməsi barədə hökm çıxardı.
   
   Sonradan mənə məlum oldu ki, hər iki satıcı əvvəldən tanış imişlər. Hazırda məhkəmə qətnaməsi olmasına baxmayaraq, hər iki xanım mənə dəymiş ziyanı ödəməkdən imtina edirlər və məhkəmənin hökmün icrasını təmin etməli iş icraçıları da heç bir tədbir görə bilmirlər.
   
   "Ədalət" qəzetinə müraciət etməklə inanıram ki, məhkəmə orqanları tərəfindən mənə qarşı edilən ədalətsizliklərə son qoyulacaq, adiyyati orqanlar mənə dəymiş ziyanın ödənilməsində və günahkarların layiqli cəza almasında köməklik göstərəcəklər.