Şamaxı rayonunda qardaş bacısını qətlə yetirib. Şamaxı rayon Polis Şöbəsindən APA-ya verilən məlumata görə, hadisə dünən səhər saat 07.30 radələrində rayonun Çuxuryurd kəndində baş verib. Kənd sakini, 25 yaşlı Murad Zeynalov bacısı-23 yaşlı İlahə Zeynalovanı bıçaqlayıb. İ. Zeynalova aldığı bıçaq zərbələrindən yerindəcə keçinib.
   
   Polis əməkdaşlarının həyata keçirdiyi əməliyyat axtarış tədbirləri nəticəsində hadisəni törədən M. Zeynalov saxlanılıb. İlkin ehtimala görə, hadisə namus üstündə baş verib. Faktla bağlı Şamaxı rayon Prokurorluğu tərəfindən Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, istintaq gedir.

Bakı metrosunda ölüm hadisəsi baş verib. Yasamal rayon Prokurorluğundan APA-ya verilən məlumata görə, hadisə yanvarın 29-da səhər saatlarında Metropolitenin "İnşaatçılar" stansiyasında qeydə alınıb. 1947-ci il təvəllüdlü Tofiq Məhəmməd oğlu Məmmədov qatara minərkən qəflətən keçinib.
   
   Olay yerinə Yasamal rayon Prokurorluğunun əməkdaşları gəlib. Meyitə ilkin baxış keçirən ekspertlər onun ürək tutmasından öldüyünü bildiriblər. Faktla bağlı araşdırma aparılır.

Bakıda iki nəfər dəm qazından boğulub. APA-nın məlumatına görə, hadisələrdən biri Bakının M. Hadi küçəsində qeydə alınıb. 1952-ci il təvəllüdlü Şirazi Xəlilov hamamda çimərkən dəm qazından boğulub.
   
   Növbəti bədbəxt hadisə isə Biləcəri qəsəbəsində baş verib. Qəsəbə sakini, 23 yaşlı Fəridə Tağıyeva vanna otağında çimərkən dəm qazından boğularaq ölüb. Hər iki faktla bağlı araşdırma aparılır.