"Son 5 ildə ilk dəfə olaraq, Azərbaycanda əlilliyin artım dinamikasında azalma baş verib. Ən böyük azalma isə 2009-cu ildə qeydə alınıb". Əmək və Əhalinin Sosial Müdafiəsi naziri Füzuli Ələkbərov jurnalistlərə açıqlamasında bildirib ki, ötən il əlilliyin artım dinamikası əvvəlki illə müqayisədə 6412 nəfər azalıb. Bu isə 2008-ci ildəkindən 25,9 faiz aşağıdır. Tam reabilitasiya göstəricisi isə 5,4 faiz olub ki, bu da son 5 ilin ən böyük göstəricisidir.
   
   Nazir ötən il əlilliyin artım dinamikasının aşağı düşməsini Səhiyyə Nazirliyi ilə birgə həyata keçirilən tədbirlərin nəticəsi kimi dəyərləndirib. Onun sözlərinə görə, ötən il Azərbaycanda reabilitasiya müəssisələrinin şəbəkəsi xeyli genişləndirilib. Xaçmaz və Yevlax şəhərlərində hər biri 14 çarpayılıq yeni bərpa mərkəzləri açılıb. Füzuli Ələkbərov bildirib ki, əlillərin bərpa-müalicəsinin səmərəli təşkili bu il üçün də prioritet vəzifə olacaq. Onun sözlərinə görə, artıq əlillik problemlərinə kompleks şəkildə aradan qaldırılması, onların cəmiyyətə inteqrasiyası məqsədilə vahid məlumat bazasının təşkilinə başlanıb. "2009-cu ildə Azərbaycanda həyata keçirilən sosial layihələrin heç biri kəsirdə qalmayıb. Nəzərdə tutulan bütün tədbirlər, o cümlədən ödəmələr vaxtında yerinə yetirilib". F.Ələkbərov məsələ ilə bağlı açıqlamasında bildirib ki, ötən il ölkədə 144 min 829 ailə ünvanlı dövlət sosial yardımlarından bəhrələnib. Hər ailəyə orta hesabla 113 manat həcmində ünvanlı sosial yadım ödənilib. Nazir bildirib ki, 2008-ci illə müqayisədə ötən il sosial müavinət alanların sayı 387 min 547 nəfərdən 394 min 901 nəfərə çatıb. İl ərzində təqaüd alanların sayı isə 32 min 925 nəfər olub. Füzuli Ələkbərovun sözlərinə görə, sosial müavinət alanların sayının sabit qalmasının əsas səbəbi əlilliyə görə sosial müavinət alanların sayında artımın minimuma endirilməsidir.
   
   "Ötən il Əmək və Əhalinin Sosial Müdafiəsi Nazirliyi tərəfindən əlil və şəhid ailələri üçün 707 mənzil tikilərək istifadəyə verilib. Bu isə 2008-ci illə müqayisədə 2 dəfə çoxdur". Nazir Füzuli Ələkbərov jurnalistlərə açıqlamasında belə deyib. Onun sözlərinə görə, 2008-ci ildə 396 mənzil istifadəyə verilmişdisə, ötən il 707 mənzilin tikintisi başa çatdırılıb. Bu il isə 387 mənzilin inşası yekunlaşacaq.
   
   Nazir qeyd edib ki, indiyədək 3 mindən artıq əlil və şəhid ailəsi dövlət hesabına mənzillərlə təmin olunub. Bundan başqa, 1998-2009-cu illər ərzində 2114 ədəd "OKA" markalı minik avtomobilləri həmin kateqoriyadan olan əlillərə verilib. Ötən il əlillər üçün daha 500 ədəd "Slavuta" markalı avtomobil respublikaya gətirilib.
   
   "2009-cu ildə rayon və şəhər əhalisinin sosial müdafiə mərkəzlərində 50 fakt üzrə araşdırmalar aparılıb. Nəticədə 5 nəfər tutduqları vəzifələrdən azad olunub. 79 nəfərə isə töhmət verilib". F.Ələkbərovun sözlərinə görə, aparılan araşdırma nəticəsində 80600 manat qanunsuz ödənmiş vəsait təqsirkar şəxslər tərəfindən tutularaq büdcəyə qaytarılıb: "Vəzifədən sui-istifadə edən şəxslər haqqında inzibati qaydada tədbirlər görülür". Nazir qeyd edib ki, görülən tədbirlər nəticəsində nazirliyin müxtəlif strukturlarında işin keyfiyyəti xeyli yaxşılaşdırılıb. F. Ələkbərov belə nəzarət tədbirlərin bundan sonra da davam etdiriləcəyini bildirib.
   
   "2009-cu ildə Azərbaycanda həyata keçirilən sosial layihələrin heç biri kəsirdə qalmayıb. Nəzərdə tutulan bütün tədbirlər, o cümlədən ödəmələr vaxtında yerinə yetirilib". F.Ələkbərov məsələ ilə bağlı açıqlamasında bildirib ki, ötən il ölkədə 144 min 829 ailə ünvanlı dövlət sosial yardımlarından bəhrələnib.