ATƏT-in Minsk Qrupunun həmsədr ölkələrinin dəvəti ilə Azərbaycan və Ermənistan prezidentləri İlham Əliyev və Serj Sarkisyan noyabrın 22-də Fransanın Münhendəki baş konsulunun iqamətgahında bu il ərzində altıncı dəfə bir araya gələcəklər.
   
   APA-nın "RİA Novosti"yə istinadən verdiyi məlumata görə, bu barədə Fransa Xarici İşlər Nazirliyinin mətbuat katibi Bernar Valero Parisdə keçirdiyi mətbuat konfransında rəsmi açıqlama verib. O, 2007-ci ilin noyabrında Madriddə Fransa və Rusiyanın xarici işlər nazirləri və ABŞ-ın dövlət katibi tərəfindən tərəflərə münaqişənin ədalətli, uzunmüddətli və dinc yolla həllinin əsas prinsiplərinin təqdim olunduğunu bildirib. Açıqlamada "Böyük səkkizlər"in Akvil şəhərində keçirilən sammiti zamanı da həmsədr ölkə rəhbərlərinin birgə bəyanatla çıxış etdikləri və tərəfləri Madrid prinsiplərinin razılaşdırılmasını başa çatdırmağa çağırdıqları xatırladılıb.