Yeri gəlməsə də o məşhur məsəli xatırlatmalı olacam: əzrayılla dost olan biri papağını yan qoyub gəzir ki, dostum canımı almamışdan qabaq xəbər eləyəcək. Bir gün kişinin sağ tərəfindəki qonşusu rəhmətə gedir. Kişinin vecinə olmur. Bir gün soldakı qonşu ölür. Yenə vecinə almır. Bir gün də Əzrayıl müəllim qapını kəsdirir ki, hazırlaş, gedirik. Ay dad, ay aman, bəs söz vermişdin, xəbərdarlıq edəcəkdin, bu nə kişilikdi, bu nə namərdlikdi?.. Əzrayıl müəllim müəllimliyini yadından çıxarıb qəşəng bir söyüş söyür və deyir:
- Alə, quşbala, xəbərdarlıq bə nətəhər olur, sağından apardım, solundan apardım, bilmirdin ki, növbə ortanındır?..
Donuz qripindən danışmaq istəyirəm. Sağımızda-solumuzda tüğyan eləyir, yatmışıq filin harasındasa. Elə rahat, elə sakit danışır, hərəkət eləyirik ki, sanki ya donuzlarla doqovor bağlamışıq, ya da qripin özü ilə. ANS-də adamın gözünü deşən qırmızı hərflərlə yazırlar ki, noyabrı 15-dən Azərbaycana donuz qripinə qarşı vaksin gətiriləcək. Qardaşım, ölüyə apisilin vurmağın mənası yoxdur ey... Qrip uje burdadır, özü də saatbasaat artmaqdadır. Vaksin artıq burada olmalı idi!
Dezinfeksiya kampaniyasına baxırsınızmı? Məktəblərin bir hissəsini guya dezinfeksiya etdilər, televizora da çəkdilər, hesabat da verdilər. Xəbəriniz oldumu ki, məktəb zavxozları ilə briqada rəhbərləri arasında danışığa əsasən bir çox yerlərdə ancaq giriş qapısının ağzına dərman vurdular - onun da hansı keyfiyyətdə olduğunu özlərindən başqa heç kim bilmədi? O nə qırmızı yalan idi ki, televiziya ekranından məsul şəxs dedi ki, bağçalarda dezinfeksiya etməyə ehtiyac yoxdur. Metro işçilərinin bayramını təbrik edirəm. Amma hər vaqonun qırağına bir-iki "pıss" eləməklə qripdən qorunmaq olmayacaq, vallah, olmayacaq.
Qoy o bu gün üçün effektli sayılan "teraflyu"-du-nədi Azərbaycana gətirilsin, o dəqiqə elan edəcəklər pulsuz verilir: ancaq xəstəxanalarda olur. Amma apteklərdə onun qiymətinə baxırsınız. A kişilər, biz ölümlə alver eləməyə də çəkinməyən qövmük. Adicə masqa nədir ki, əvvəllər modabazlar itlərinin ağzına taxırdı, indi onun da həm defisiti çıxıb, həm də qiyməti qalxıb ceyran dalına.
İstəsək də, istəməsək də gələcək. Bu pandemiyadı, mən ölüm-sən öl qanmır. Bu templə onu qarşılamağa hazırlaşmaqda davam eləsək, özümüzü əziyyətə salmasaq yaxşıdır, elə birdəfəlik silib aparacaq. Özü də varlıya-kasıba, yekəburuna-fındıqburuna baxmayacaq, hamını bir ostanovkaya sürüyüb ictimai nəqliyyatla aparacaq. Əh, yeganə millətik ki, "SOS" deyəndə də ondan başqa məna çıxarırıq. Vallah, bəlkə də donuz qripi o qədər də qorxulu deyil, amma donuzxislətlilər çoxdur, ona görə də qorunmaq vacibdir.
P.S. Çoxdandır məlum səbəbdən iş yerinə gəlmirəm. Yəqin ki, kollektivin köhnə mehribanlığı qalmaqdadır. Mehriban olun, amma qadanızı alım, görüşəndə öpüşməyin. Mənim tövsiyəmdi deyən qulaq ardına vurmayın. ÜST də, NATO da, ATƏT də belə deyir. Şefə xatırladın ki, qrip deputat toxunulmazlığını heç harasına almır ha. Allah amanında, işçilər də, oxucular da, millət də. Amma vəziyyət çox təhlükəlidir, bacardıqca özünü qorumağa çalışın!..
