Bu hadisə miladi tarixi ilə 2009-cu ilin on birinci ayının say hesabına görə nəhs günündə, yəni 13-də, Bakı Slavyan Universitetində vaqe oldu. Həmin gün on yaşlı ali təhsil ocağının rəhbərliyi könüllü surətdə öz fəaliyyətini dondurub, bu şərəfli və məsuliyyətli işi tələbələrin içərisindən təbii seçim yolu ilə meydana çıxan namizədlərin ümidinə buraxmışdılar. Namizədlərin seçimi və hazırlığı təxminən iki ay sürdü. Nəhayət gözlənilən an gəlib çatdı. Rektor Kamal Abdulla başda olmaqla bütün prorektorlar, dekanlar o gün vəzifədən kanarlaşdıqları üçün əmək haqqı da almayacaqdı. Hər birinin alnına bir günlük xəlifəlik yazılan gənclər onları əvəz edəcəkdi. Kamal müəllimin göstərişi, Nüşabə xanımın (Baş mühasib-E.B.) rizası ilə həmin günün əmək haqqı da tələbə rəhbərlərin şəxsi hesabına köçürüləcəkdi. Bu barədə padşahın fərmanı qədər ciddi hüquqi qüvvəyə malik olan əmrin surətini Malik müəllim (kadrlar şöbəsinin müdiri -E.B.) xüsusi elan lövhəsində asmışdı. Universitetin Tələbə radiosunu eşidənlər, "Tələbə dünyası" qəzetini oxuyanlar "Xəlifə günü"nün nə demək olduğundan qabaqcadan xəbərdar idilər. Qoy mənim oxucularım da bunu bilib agah olsunlar ki, olduqca orijinal və böyük tərbiyəvi əhəmiyyətə malik təşəbbüs Allahın verdiyi yazıçı, alim, müəllim istedadını göz bəbəyi kimi qorusa da, tələbələrin yolunda onu səxavətlə xərcləməyi xoşlayan, cəmiyyətdə cibinin yox, qəlbinin, düşüncəsinin, xəyallarının, arzularının böyüklüyü ilə nüfuz qazanan rektor Kaman Abdullaya aiddir. "Xəlifə günü " dördüncü dəfədir keçirilir. Bütün tədris müəssisələrində olduğu kimi, BSU-nun da tədris proqramı Təhsil nazirliyində təsdiqlənir. Amma "Xəlifə günü" Universitet rəhbərliyinin dərs proqramına, çox uğurlu əlavəsidir. Görünür Təhsil nazirliyində də bu fikirdədirlər. Yoxsa neçə ildən bəri davam edən "özbaşınalığın" qarşısını çoxdan alardılar.
Noyabr ayının 13-də səhər tezdən BSU-nun giriş qapısında rektorun qara rəngli xidməti maşının qapısı açılanda içindən Aytən Hüseynova çıxdı. O, səlahiyyətlərini yerinə yetirmək üçün ikinci mərtəbədəki iş otağına doğru yollandı. Köməkçisi, katibəsi ilə görüşüb kabinetə daxil oldu.
Saat 8.30-dan Universitetdə dərslər öz minvalı ilə davam edirdi. Amma, auditoriyadan kənar dərslərin, görüşlərin sayı xeyli artmışdı. Görünür, Xəlifə belə istəmişdi.
Akt zalında Polşa Respublikasının Azərbaycandakı fövqəladə və səlahiyyətli səfiri Kşistov Krayevski, Konstitusiya məhkəməsinin məsul işçiləri, Azərbaycan Kinomatoqrafçılar İttifaqının katibi, xalq artisti Rasim Babayev, əməkdar incəsənət xadimi Əbdül Mahmudov, əməkdar artist Xalidə Qasımova , Böyük Vətən müharibəsi veteranları ilə maraqlı görüşlər oldu. Universitetin Heydər Əliyev Tələbə teleradio şirkətinin studiyası da elə hey dolub-boşalırdı. Canlı verilişlərin sayı xeyli artmışdı. "Xəlifə günü"nün xoş təəssüratı ilə bölüşənlərlə müsahibə aparan jurnalist tələbələr idi.
Fəxri Qonaqlar kitabına yazılan ürək sözlərindən bəzi sətirlər.
Rasim Balayev - xalq artisti:
Bakı Slavyan Universitetinə ilk dəfədir ki, qədəm basıram. Haqqında çox gözəl sözlər eşitmişdim. Amma bu təhsil ocağındakı yeniliklərin, nailiyyətlərin, inkişafın bugün şahidi oldum. "Xəlifə günü" çox maraqlı pedaqoji tapıntıdır. Mən onun bütün iştiralçılarına şəxsi həyatlarında, təhsildə böyük uğurlar diləyirəm.
Dürdanə Məmmədova -Azərbaycan Konstitusiya Məhkəməsinin şöbə müdiri:
"Xəlifə günü" nündə iştirak etməyim mənə çox xoş təsir bağışladı.Tələbə özünüidarə etməsi gözəl təşəbbüsdür. Gənclərdə özünə inam hissini artırır, müstəqil qərar çıxarmağ ıöyrədir. Görüş zamanı bizə verilən suallardan aydın olurdu ki, tələbələrin ümumi hazırlığı yüksək səviyyədədir. Bütün bunlar BSU-da Pol Loi təhsil sisteminin
Tələbə idarəetmə günüdə auditoriyalarda keçirilən ustad dərslərin də sayı artmışdı. Jurnalistika fakültəsində Avropa Şurasının Azərbaycanda jurnalistika tədrisinin inkişafına dəstək layihəsi çərçivəsində London Sənət Universitetindən gələn foto jurnalistika üzrə təlimçi Pol Luinin mühazirəsi maraqla qarşılandı. BBC ilə sıx əməkdaşlıq edən yüksək peşəkarla işgüzar söhbət, foto müxbirlik sənətinin incəlikləri barədə tələbələrlə fikir mübadiləsi böyük maraq doğurdu. Bir sözlə, tədbirlər çox, təəssüratlar böyük, qonaqların sayı çox idi. Hətta Təhsil nazirinin müavini Elmar Qasımov da "Xəlifə günü"ndə BSU-nun rektoru Aytən xanımla tanış olmaq üçün bura təşrif buyurmuşdu. "Xəlifə günü" təkcə tələbələr üçün deyil, həm də müəllimlər üçün növbəti sınaq oldu. Mən inanıram ki, bir günlük xəlifəlik hər bir iştirakçının yaddaşında nə az, nə çox - bir ömürlük xatirə kimi qalacaq.
