İsmayıllı rayonunda üç uşaq atası həyat yoldaşını xüsusi amansızlıqla qətlə yetirib. Bu barədə APA-ya İsmayıllı rayon Prokurorluğundan məlumat verilib. Hadisə srağagün baş verib. Rayon sakini, 1976-cı il təvəllüdlü Şərafət Hidayət oğlu İbadov yaşadığı mənzildə həyat yoldaşı, 1982-ci il təvəllüdlü Cəmalə Nəcməddin qızı İbadovanı döyüb.
   
   Sonra isə həyat yoldaşını yerə yıxaraq başına küt alətlə bir neçə dəfə zərbə endirib. C. İbadova aldığı xəsarətlərdən hadisə yerindəcə keçinib. Ş. İbadov həyat yoldaşı keçindikdən sonra polisə könüllü təslim olub. O, hadisəni qısqanclıq zəminində törətdiyini bildirib.
   
   Faktla bağlı İsmayıllı rayon Prokurorluğu tərəfindən Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, araşdırma aparılır.