Lent.az-ın oxucularından biri redaksiyaya maraqlı bir məktub göndərib. Oxucu peyklə çəkilərək maps.google.com-da yerləşdirilən bir şəkillə bağlı Lent.az-a yazdığı məktubda Sumqayıt şəhərindəki xəstəxanalardan birinin xaç şəkilli olduğunu bildirib. Oxucu daha sonra məsələnin araşdırılmasını xahiş edib.
   Xəstəxananın üstdən görünüşü doğrudan da əsl xaç formasında olduğundan Lent.az onun özülünün qoyulma və istifadəyə verilmə ili, həmçinin, memarının kim olduğu ilə maraqlanıb.
   Sumqayıt Şəhər İcra Hakimiyyətindən Lent.az-a həmin tibb müəssisəsinin 2 saylı Xəstəxana olduğu bildirilib. Xəstəxana çoxprofilli xüsusi ixtisaslaşdırılmış tibbi yardım təyinatlıdır. Tutumu 400 çarpayılıqdır. Xəstəxananın rəsmi ünvanı Sumqayıt şəhər, 57-ci məhəllə, Sumqayıt-Novxanı şossesinin 5-ci km-dir.
   İcra Hakimiyyətindən 2 saylı Xəstəxananın özülünün 1988-ci ildə qoyulduğu bildirilib. Xəstəxana istifadəyə 1992-ci ilin noyabr ayında verilib.
   Hələlik tikilinin layihəsinin kim tərəfindən hazırlandığını dəqiqləşdirmək mümkün olmayıb.
   Araşdırmalarımız davam edir.