Sankt-Peterburq hüquq-mühafizə orqanları əməkdaşlarının həyata keçirdiyi əməliyyat nəticəsində beynəlxalq axtarışda olan Gürcüstan vətəndaşı, 28 yaşlı Ceyhun Yaqub oğlu Əsgərov həbs olunub. APA-nın məlumatına görə, Rusiyanın şimal paytaxtında qeyri-leqal şəkildə yaşayan Ceyhun Əsgərov Azərbaycan Cinayət Məcəlləsinin oğurluq maddəsi ilə cinayət törətməkdə ittiham olunaraq axtarışa verilib. Onun, həmçinin, terrorçuluq fəaliyyətində iştirakı güman edilir.
   Ceyhun Əsgərov haqqında axtarış Yasamal Rayon Polis İdarəsi tərəfindən bu il mayın 30-da elan olunub. Hazırda Ceyhun Əsgərov Frunze rayon daxili işlər idarəsinin 40-cı milis şöbəsinin təcridxanasında saxlanır. Axtarışda olan şəxsin həbs olunması ilə bağlı Azərbaycan hüquq-mühafizə orqanları artıq məlumatlandırılıb.

Azərbaycan paytaxtında 56 yaşlı qadın özünü çoxmərtəbəli binanın 12-ci mərtəbəsindən ataraq intihar edib. Bu barədə APA-ya Nəsimi Rayon Polis İdarəsindən məlumat verilib.
   Hadisə dünən saat 05.00 radələrində rayonun 2-ci mikrorayon ərazisində, Cavadxan küçəsi, 48 "b" ünvanında baş verib. 56 yaşlı Tərlan Məmmədəli qızı Hüseynova özünü yaşadığı binanın 12-ci mərtəbəsindən atıb. T. Hüseynova hadisə yerindəcə ölüb. İntiharın səbəbləri barədə məlumat verilməsə də, onun uzun müddətdir əsəb xəstəliyindən əziyyət çəkdiyi bildirilir.
   Faktla bağlı Nəsimi Rayon Prokurorluğu tərəfindən Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanıb, araşdırma aparılır.