İyunun 30-da Daxili İşlər Nazirliyi Bakı Şəhər Baş Polis İdarəsinin yeni binasının açılışı olub. Prezidentin mətbuat xidmətindən APA-ya verilən məlumata görə, açılışda dövlət başçısı, Silahlı Qüvvələrin Ali Baş Komandanı İlham Əliyev də iştirak edib. Prezident açılışı bildirən lenti kəsib, bina ilə yaxından tanış olub. Daxili işlər naziri, general-polkovnik Ramil Usubov dövlət başçısına yeni bina haqqında məlumat verib. Prezident görülən işləri yüksək qiymətləndirib.
   
   Dövlət başçısı DİN-in İdman Cəmiyyətinin dünən istifadəyə verilən yeni binasının açılışına da qatılıb. Prezident açılışı bildirən lenti kəsib, bina ilə yaxından tanış olub. Dövlət başçısı böyük idman zalında gənc idmançılar və Olimpiya oyunlarının mükafatçıları qarşısında çıxış edib.

Bakının Qaradağ rayonunda son iki gündə 6 nəfər qidadan zəhərlənib. Qaradağ rayon Polis İdarəsindən APA-ya verilən məlumata görə, iyunun 29-da Ələt qəsəbə sakinləri - 1986-cı il təvəllüdlü Emin Xəlilov, 1985-ci il təvəllüdlü Tural Adilov və 2006-cı il təvəllüdlü Fidan Tağıyeva qida zəhərlənməsi ilə xəstəxanaya yerləşdiriliblər. Onların vəziyyəti stabildir.
   
   Bakı şəhər Təcili Tibbi Yardım Stansiyasından isə bildiriblər ki, dünən Qaradağ rayonunda daha üç nəfər kolbasadan zəhərlənib. 49 yaşlı Nüsrət Məmmədov, 41 yaşlı Tofiq Dadaşov və 48 yaşlı Elnur Qasımov zəhərlənmə dioqnozu ilə Klinik Tibbi Mərkəzə yerləşdiriliblər. Onlar Ələt qəsəbəsi ərazisindəki tikintidə fəhlə işləyirlər. Hər iki fakt üzrə araşdırma aparılır.

"Yaxın günlərdə "reket" nəşrlərin siyahısına əlavələr olacaq". APA-nın məlumatına görə, bu barədə Azərbaycan Mətbuat Şurasında (MŞ) "reket" jurnalistikaya qarşı mübarizə komissiyasının sədri Vüqar Rəhimzadə komissiyanın təşkilindən ötən il bir il ərzində gördüyü işlərlə bağlı açıqlamasında bildirib.
   
   V. Rəhimzadə bildirib ki, komissiyanın təşkili barədə təşəbbüs ölkə jurnalistlərinin V qurultayında irəli sürülüb. V. Rəhimzadə "reket" qəzetlərin nəşr və yayımla bağlı problemlərinin yaranmasında Mətbuat Şurasını günahlandırmalarını da düzgün hesab etməyib. Komissiya sədri deyib ki, MŞ "reket" nəşrlərin yeni siyahısını ilə bağlı araşdırmaları başa çatdırmaq ərəfəsindədir. V. Rəhimzadə deyib ki, son siyahının açıqlanmasından sonra ictimaiyyətlə əlaqələr daha da genişlənib.

Bakı Metropoliteni bütün vaqonlarda müşahidə kameraları quraşdıracaq. Bu barədə "APA-Economics"ə Metropolitenin rəisi Tağı Əhmədov məlumat verib. T.Əhmədovun sözlərinə görə, bütün vaqonlarda müşahidə kameralarının qurulması tam təhlükəsizliyə nail olmaq məqsədi daşıyır: "Bu gün bütün stansiyalarda kameralar qurulub. Metropolitenə daxil olan və buradan çıxan sərnişinləri müşahidə etmək mümkündür. Vaqonlarda qurulması üçün ən müasir və rəqəmsal kameralar alınacaq".
   
   Metropoliten rəisi müşahidə kameralarının alınması üçün büdcədən vəsaitin ayrılmasına ehtiyac olduğunu və bu məqsədlə təkliflərin artıq hökumətə təqdim olunduğunu qeyd edib.

Azərbaycanda bələdiyyələrin sayı 2750-dən 1700-ə qədər azaldılıb. APA-nın məlumatına görə, bu barədə Mərkəzi Seçki Komissiyasının sədri Məzahir Pənahov qurumun dünən keçirilən iclasında bildirib.
   
   Milli Məclisin bələdiyyələrin sayının azaldılması ilə bağlı qərarını alqışladığını qeyd edən MSK sədri bunu vacib addım hesab edir: "Çünki seçkilərin keçirilməsi zamanı bələdiyyələrin sayının çoxluğu seçkilərin keçirilməsinə də problemlər yaradır. Bir tərəfdən namizədlər çox olur, digər tərəfdən, bələdiyyəyə namizədliyini irəli sürən şəxsin seçki komissiyalarında yaxın qohumunun olmaması ilə bağlı qanunun tələbi böyük problem idi. Amma indi namizədlərin sayı az olacaq və bu zaman namizədin komissiyalarda qohumunun olub-olmamasını araşdırmaq da asanlaşacaq".