"Xalqına şərəflə xidmət etməkdən böyük xoşbəxtlik ola bilməz". Ulu Öndər Heydər Əliyevin sözləri ilə tamamlanan "Mənalı ömrün akkordları" kitabı "Şuşa" nəşriyyatı tərəfindən oxuculara ərməğan edilmişdir. Müəllif "Kirpi" satira-yumor jurnalının əməkdaşı Ceyran Fikrətqızıdır. Gənc jurnalist kitabda Dünya Boks Federasiyasının hakimi, Azərbaycan Boks Federasiyasının vitse-prezidenti, əməkdar bədən tərbiyəsi və idman xadimi, istedadlı alim, xeyirxah, sadə, qayğıkeş insan, gözəl ailə başçısı Niftalı Quliyevin mənalı həyat yolundan söhbət açır. Bir çox samballı elmi məqalə, metodiki vəsait və tövsiyyələr müəllifi olan Niftalı Quliyevin idmanımızın günün tələbləri səviyyəsində qurulmasında, gənclərin bu sahəyə həvəsləndirilməsi və peşəkarlıqlarının artırılmasında əvəzsiz xidmətləri konkret faktlarla, aydın dillə təsvir edilmişdir.
   
   Kitab bu gün dünyada kifayət qədər məşhur olan boksçunun hələ gənc yaşlarından qəlbində baş qaldıran arzularının illər keçdikcə böyüməsindən, hər cür çətinliyi inamla dəf edərək məqsəd və amalına çatmasını peşə dostlarının, onu yaxından tanıyanların dili ilə oxuculara çatdırır.
   
   Azərbaycanın qədim torpağı olan Zəngəzur mahalında dünyaya gələn Niftalı Quliyevin boks sahəsindəki nailiyyətləri ilə bərabər ölkənin ictimai-siyasi həyatındakı fəaliyyəti, vaxtaşırı mətbuatda maraqlı mövzularla çıxışları da diqqəti cəlb edir.
   
   Kitabı vərəqlədikcə o da məlum olur ki, dədə-babadan bizə ərməğan qalan "Əldən tutmaq Əlidən qalıb" prinsipi bu insanın xarakterik xüsusiyyətlərindən birinə çevrilmişdir.
   
   Kitaba ön söz yazan əməkdar mədəniyyət işçisi Polad Qasımov göstərir ki, bu əsər bir də ona görə dəyərlidir ki, müəllif öz qəhrəmanını bütün ömrünü boksa həsr edən əfsanəvi bir insan kimi gələcək nəslə canlı həyat məktəbi kimi təqdim etməyə çalışmışdır.
   
   Yetişməkdə olan nəslə hər zaman mənəvi dəstək olan Niftalı Quliyevin saysız-hesabsız yetirmələrinə və pərəstişkarlarına bu kitab ən gözəl hədiyyədir.