"Azərbaycandan cəlbedici təklif almışam, amma çox pula ehtiyacım yoxdur". "APA-Sport" agentliyinin məlumatına görə, bu sözləri "Qalatasaray" klubunun hücumçusu Hakan Şükür deyib.
   Karyerasını harada davam etdirəcəyi ilə bağlı qəti qərara gəlmədiyini bildirən Türkiyə yığmasının sabiq üzvü "Xəzər-Lənkəran"dan təklif aldığını təsdiqləyib. 37 yaşlı futbolçu bildirib ki, hazırda təklifləri dəyərləndirir: "Mənə Azərbaycanla yanaşı, Dubay təmsilçisindən də dəvət göndərilib. Lakin bu günlərdə ABŞ-ın "Metrostars" komandasına başım qarışıb. Bu klubun nümayəndələri danışıqlar aparmaq üçün tezliklə İstanbula gələcəklər. Bəlkə də yaxında yerləşdiyini nəzərə alıb Dubaya üstünlük verdim".
   Birləşmiş Ərəb Əmirlikləri, İtaliya və ABŞ-a qısamüddətli səfərdən sonra vətənə dönən H.Şükür məşqçi fəaliyyətinə başlayacağını da istisna etməyib. Futbolçu vurğulayıb ki, Türkiyədə yalnız "Qalatasaray"ın şərəfini qorumağa hazırdır: "Türkiyənin 12 klubu mənimlə maraqlanır. Hətta bunlardan biri "böyük klublar"dan sayılır. Komandanın prezidenti ilə münasibətlərim çox yaxşıdır. Amma ona və digərlərinə öz ölkəmdə "Qalatasaray"dan başqa klubda oynamayacağımı bildirmişəm. Məşqçi fəaliyyətinə başlamağım da gündəmdədir".