"Gürcüstanda yaşayan azsaylı millətlərin problemləri çoxdur. Bu problemlər həm də dövlətin problemidir. Bacardığım qədər dövlətin arxasında dayanıb, bu problemləri, o cümlədən azərbaycanlıların problemlərini həll etməyə çalışacağam". Bu eksklüziv açıqlamanı APA-ya Gürcüstan prezidentinin milli məsələlər üzrə yeni təyin etdiyi müşaviri, soydaşımız Mübariz Qarayev deyib. M. Qarayevin sözlərinə görə, prezident milli məsələlər üzrə özünə 5 müşavir təyin edib: "Onlardan biri də mənəm".
   
   Təyinatın onun üçün gözlənilməz olduğunu deyən M. Qarayev bu barədə sərəncamın mayın 18-də imzalandığını bildirib. O, prezident Mixail Saakaşvili ilə bu günlərdə görüşəcəyini söyləyib.
   
   

Dünən Bakı şəhərinin Azadlıq prospekti və Dilarə Əliyeva küçəsini birləşdirən yeni avtomobil yolunun açılışı olub. "APA-Economics"in məlumatına görə, Azərbaycan Dövlət Neft Akademiyasının yanından (Cəfər Cabbarlının heykəlinin qarşısı) başlanan yol Puşkin küçəsinə çıxır.
   Nəqliyyat Nazirliyinin "Azəryolservis" ASC-nin sədr müavini Vaqif Hacıyev bildirib ki, bu yol ərazidə nəqliyyat sıxlığını qismən də olsa azaltmağa imkan verəcək. Eyni zamanda avtomobillər dəmir yolu vağzalına keçə biləcəklər.

Tələbə Qəbulu üzrə Dövlət Komissiyası (TQDK) əsas (9 illik) təhsil bazasından orta ixtisas məktəblərinə tələbə qəbulu elan edib.
   TQDK-dan APA-ya daxil olan məlumata görə, Bakı şəhərində abituriyentlər sənədlərini təhsil aldıqları tədris müəssisəsinin yerləşdiyi rayona müvafiq olaraq orta məktəblərdə yaradılmış Sənəd Qəbulu Komissiyasına, digər bölgələrdə isə Rayon Təhsil Şöbəsində yaradılmış SQK-ya təqdim etməlidirlər. Sənəd qəbulu iyulun 31-nə qədər davam edəcək.
   

"Temperaturun hər il artımı qeydə alınır. Amma temperatur artımının fəsillər üzrə aparılan təhlilləri göstərir ki, bütün fəsillərdə temperatur artsa da, yaz fəslində bu artım sıfıra yaxınlaşır və müşahidə edilmir".
   
   APA-nın məlumatına görə, bunu Azərbaycan Ekologiya və Təbii Sərvətlər Nazirliyinin Hidrometeorologiya Elmi Tədqiqat İnstitutunun direktoru Rza Mahmudov deyib. O bildirib ki, həmişə qlobal istiləşmədən sonra soyuqlaşma dövrü başlayır: "Buna görə də yaxın 30-40 il ərzində Şimali Avropa ölkələrində soyuqlaşmanın baş verəcəyi gözlənilir. İngiltərədə hətta qısa müddət ərzində buzlaşmanın ola biləyi də proqnozlaşdırılır".
   
   R. Mahmudov gələcəkdə Azərbaycanda da belə halların müşahidə olunacağını istisna etməyib.
   
   

Təhsil Nazirliyi 6 iyun tarixində keçirilən mərkəzləşdirilmiş imtahandan 2" qiymət alan məktəblilərə yenidən şans verdi. Təkrar imtahanlar 19 iyun saat 10:00-da Bakı şəhərində keçirildi.
   Buraxılış itmhanında iştirak etmək üçün qeyri-kafi qiymət almış 5000-ə yaxın şagirddən yalnız 1500-ü nazirliyə ərizə ilə müraciət edib. Təkrar imtahanlar beş mərkəzdə təşkil edilib. Şagirdlər yalnız qeyri-kafi qiymət aldığı fənlərdən imtahan verib. Qalan 3500 nəfərin taleyi ilə maraqlanmaq üçün Bakı şəhər Baş Təhsil İdarəsinin ictimaiyyətlə əlaqələr şöbəsinin müdiri Zəminə Əliqızına müraciət etdik. O, bizimlə söhbətində qalan 3500 nəfərin heç bir ərizə ilə nazirliyə müraciət etmədiyini xatırlatdı: "Nazirlik bu şagirdlərə şans verdi. Belə çıxır ki, "2" alan şagirdlər qüvvələrinə inanmadıqları üçün imtahanda iştirak etmək istəməyiblər. Onlara müəyyən müddətdə məktəbdə oxuduqlarını təsdiqləyən arayış veriləcək. Əgər istəsələr gələn il keçiriləcək mərkəzləşdirilmiş imtahanda "2" aldıqları fəndən imtahan verə bilərlər. Müvəffəqiyyət qazanacaqları halda təbii ki, onlara da digər şagirdlərlə yanaşı, attestat veriləcək". Z.Əliqızı imtahanın nəticələrinin bu gün nazirliyin internet saytında yerləşdiriləcə-yini də bildirdi.
   
   

Bu ilin yanvar-aprel aylarında Azərbaycanda müəssisə və təşkilatlarda muzdla çalışan işçilərin siyahı sayı 1 372,2 min nəfər təşkil edib ki, onların 869,7 min nəfəri (63,4%) dövlət bölməsində, 470,8 min nəfəri (36,6%) isə qeyri-dövlət bölməsində fəaliyyət göstərib.
   Dövlət Statistika Komitəsindən "APA-Economics"ə verilən məlumata görə, muzdla işləyənlərin 20,8%-i istehsal sahələrində o cümlədən 13,4%-i sənayedə, 4,7%-i tikintidə, 2,7%-i kənd təsərrüfatı, ovçuluq, meşə təsərrüfatı və balıqçılıq sahəsində məşğul olub. Xidmət sahəsində çalışanların 25,3%-i təhsil, 19,6%-i topdan və pərakəndə ticarət, avtomobillərin, məişət məmulatlarının və şəxsi istifadə əşyalarının təmiri, 10%-i səhiyyə və sosial xidmətlərin göstərilməsi, 6,9%-i nəqliyyat, anbar təsərrüfatı və rabitə, 6,1%-i digər kommunal, sosial və şəxsi xidmətlərin göstərilməsi, 5%-i daşınmaz əmlakla əlaqədar əməliyyatlar, icarə və istehlakçılara xidmət göstərilməsi, 3,9%-i dövlət idarəetməsi və müdafiə sahəsində, 2,4%-i isə digər sahələrdə cəmlənib. Cari ilin ilk dörd ayı ərzində müəssisə və təşkilatlarda 4,6 min nəfər əcnəbi iqtisadi əmək fəaliyyəti ilə məşğul olub. Əcnəbilərin 1,4 min nəfəri sənayedə, 1,3 min nəfəri tikintidə, 0,9 min nəfəri daşınmaz əmlakla əlaqədar əməliyyatlar, icarə və istehlakçılara xidmət göstərilməsi sahəsində, 0,5 min nəfəri topdan və pərakəndə ticarət, avtomobillərin, məişət məmulatlarının və şəxsi istifadə əşyalarının təmiri sahəsində, 0,2 min nəfəri təhsildə, 0,3 min nəfəri isə digər sahələrdə işlənib.
   Cari ilin yanvar-may aylarında müəssisə və təşkilatlarda tutulan iş yerlərinin ümumi sayında kənar əvəzçilərin payı 0,6% və mülki-hüquqi xarakterli müqavilələr əsasında işləri yerinə yetirən şəxslərin sayı 1,2% təşkil edib.
   Məşğulluq mərkəzlərinin məlumatına görə, 2008-ci il iyun ayının 1-i vəziyyətinə rəsmi işsiz statusu verilmiş şəxslərin sayı 45,146 min nəfər olub və onların 47,7%-ni qadınlar təşkil edib. Bir boş iş yerinə tələbat işsiz statusuna malik olan 4 nəfər şəxsdən ibarət olub.

Azərbaycan Standartlaşdırma, Metrologiya və Patent üzrə Dövlət Agentliyinin (SMPDA) laboratoriyalarında sınaqdan keçirilən elektrik və qaz sayğaclarının 10-15%-nin yararsız olduğu müəyyənləşib.
   Bunu SMPDA-nın baş direktoru Ramiz Həsənov bildirib. R.Həsənovun sözlərinə görə, agentlik belə yararsız və standartlara cavab verməyən sayğacları plomblamır və onların istifadəsinə icazə verilmir.
   Mənzillərə quraşdırılmış elektrik və qaz sayğaclarının bəzən sərfiyyatı artıq göstərməsinə gəlincə, agentlik rəhbəri bu problemin sonradan, sayğaclar daşınan zaman silkələnmə və ya hansısa təsirdən yarandığını güman edir.

Bu ilin iyul ayında Azərbaycana ABŞ-ın "Seqway" şirkətinin istehsal etdiyi 10 "Seqway" maşını gətiriləcək. Bu barədə APA-ya maşınları ölkəyə idxal edəcək "Ziya Turizm" şirkətinin prezidenti Rəhim Hüseynov məlumat verib.
   R.Hüseynovun sözlərinə görə, artıq nümunə üçün Azərbaycana gətirilən ilk analoji maşın iki təkərli olsa da, istifadədə çox rahatdır və avtomaşınlar kimi ətraf mühitə ziyan vurmur. "Seqway" maşınları batareya enerjisi ilə çalışır və bu batareyadan maşın fasiləsiz 8-10 saat ərzində qidalana bilər. Nəqliyyat vasitəsinin maksimal sürəti isə 20 km/saat təşkil edir.

Azərbaycan Standartlaşdırma, Metrologiya və Patent üzrə Dövlət Agentliyi (SMPDA) iyun ayı ərzində müxtəlif qida məhsulları istehsal edən 18 müəssisədə dövlət nəzarəti aparıb.
   Bunlardan 9-u hüquqi, 9-u isə fiziki şəxslərdir. "APA-Economics"in məlumatına görə, bunu agentliyin baş direktoru Ramiz Həsənov bildirib. Monitorinq zamanı çörək, süd və alkoqolsuz içkilər istehsal edən 8 istehsalçı barəsində müvafiq tədbirlər görülüb. "Ulduz" MMC-nin istehsal etdiyi 11 adda kolbasa məmulatının istehsalı və satışı qadağan edilib.
   Həmçinin "Dad" MMC-nin süd və ağartı, "Soyuqbulaq" MMC-nin sərinləşdirici içki, 24 saylı çörək sexində və "Koral-F" müəssisəsində çörək və digər şirniyyat məhsullarının istehsalına qadağa qoyulub. Bu müəssisələrə ümumilikdə 18 iradnamə və 15 inzibati protokol yazılıb. "Ərzaq sahəsində problemlərimiz çoxdur. Məhsulların əksəriyyəti müvafiq standartlara uyğun gəlmir", - deyə agentlik rəhbəri vurğulayıb.
   R.Həsənov bildirib ki, bəzi şəxslər öz evlərində və həyətlərində kiçik sexlər yaradaraq müxtəlif məhsulların istehsalı ilə məşğuldur. Həmin şəxslər dövlət nəzarətini həyata keçirən agentliyin əməkdaşlarını istehsalat prosesi ilə tanış olmağa buraxmır, hətta təhqir edirlər. R.Həsənovun sözlərinə görə, daha çox problem dondurma sexlərində mövcuddur. Bu ay keçirilən reydlər zamanı dondurma istehsal edən üç müəssisənin fəaliyyətinə qadağa qoyulub və onların barəsində sənədlər hüquq mühafizə orqanlarına göndərilib.

"Ötən illərlə müqayisədə bu ilin iyun ayında Azərbaycanda havalar daha sərin keçir". APA-nın məlumatına görə, bunu Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun direktoru İmran Məmmədov deyib.
   O bildirib ki, iyun ayında temperatur rejimi normadan 3-4 dərəcəyədək aşağı düşüb. İ. Məmmədov yay fəslində ən isti günlərin iyulun ikinci yarısında və avqustda qeydə alınacağını söyləyib. Ümumilikdə iyulda temperatur rejiminin norma daxilində olacağı, cənub axınları ilə əlaqədar temperaturun yüksələcəyi gözlənilir. İyulda havanın orta aylıq hərarətinin 24-26, ayın ikinci yarısında 33-35, ayrı-ayrı günlərdə isə 35, hətta 39 dərəcə olacağı proqnozlaşdırılır. Ay ərzində yağıntıların miqdarının da norma daxilində olacağı, Lənkəran-Astara bölgəsinə bir qədər çox yağıntının düşəcəyi gözlənilir.
   İ. Məmmədovun sözlərinə görə, avqustda hava şəraiti iyuldakından az fərqlənəcək və temperatur rejimi iyuldakına yaxın olacaq. Həmin ayda ayrı-ayrı günlərdə havanın hərarətinin 35-38, bəzi günlərdə 39, hətta 40 dərəcəyə çatacağı istisna edilmir.

"Bazar günü ali məktəblərin magistratura pilləsinə qəbul imtahanlarında iştirak etmək üçün saxta diplomla sənəd verənlərin sayı 700 nəfərə çatıb".
   Bu barədə Tələbə Qəbulu üzrə Dövlət Komissiyasının (TQDK) sədri Məleykə Abbaszadə dünən keçirdiyi mətbuat konfransında məlumat verib. O, TQDK-nın məlumat bazasında 1 milyon 500 min gənclə bağlı informasiya olduğunu bildirib: "Həmin 700 nəfərin bakalavr pilləsinə qəbul olması ilə bağlı həmin bazada məlumat yoxdur. Təbii ki, bu, qeyri-qanuni hal kimi araşdırılır. Bu vaxta qədər aparılan araşdırma zamanı bəlli olub ki, həmin şəxslərin arasında xarici ölkələrdə təhsil alanlar var. Amma onların diplomları tanınıb və biz həmin məlumatları bazaya daxil etmişik".
   Məleykə Abbaszadə MDB ölkələrində 117 ali məktəbdən Azərbaycanın ali məktəblərinə köçürmələr olduğunu deyib: "Amma 4 ali məktəbdən - Dağıstan Universiteti, Mahaçqala Universiteti, Moskva Açıq Universiteti, Sanki-Peterburq Hüquq və İqtisadi Əlaqələr Universitetindən Azərbaycanın ali məktəblərinə kütləvi köçürmələr olur. Tutaq ki, bir ildə 200 nəfər Azərbaycanın ali məktəblərinə köçürülür. Təbii ki, bunlar süni xarakterli köçürmələrdir".
   M. Abbaszadə bu araşdırmaların davam etdiriləcəyini və buna baxmayaraq, həmin 700 nəfərin magistraturaya qəbul imtahanlarına buraxılacağını vurğulayıb.